历代志下 27章1节 到 27章9节   背景资料  上一笔  下一笔
Chit章是记载约坦执政ê时期ê事迹。伊是tī主前750到735年。前后执政16年。Mā是历代君王中记事siōng简略ê一位。

第1到2节,chia讲约坦执政时间有十六年。这十六年中有十年是kah老父乌西雅同齐执政,因为乌西雅hō͘ 上帝惩罚患tio̍h癞ko病。M̄-koh伊做上帝看做对ê事。「只是伊无参加圣殿ê礼拜」,这真可能kah伊ê老父乌西雅患癞ko病有关。原因是伊mā是khiā起tī王宫,而癞ko是无清气ê,表示伊mā是无清气。真可能因为伊无参加圣殿礼拜,致使犹大人民对信仰ê事就疏忽了,mā常去拜偶像神明。

第3到5节,chit段经文讲约坦重视国防,ná亲像in老父仝款,修建堡垒,而且强化圣殿围墙ê防御工程。伊phah败亚扪人,并且强迫亚扪人一定tio̍h向伊进贡三年,每年tio̍h缴交「三千四百公斤银á,一千公吨小麦,一千公吨大麦」。

第6到9节,伊一生lóng忠实tī上帝。可惜ê是,伊只有四十一岁就往生à。然后由伊ê kiáⁿ亚哈斯继任王位。

虽然kan-taⁿ是简单ê记述伊执政ê情况,m̄-koh却说明tī伊执政之下,犹大tī军事、政治上lóng有真好ê成就,包括军事顶面phah败亚扪,hō͘亚扪人连续三年向犹大进贡,伊mā修筑城墙,hō͘国家防御功能增强。只是tī宗教信仰上,虽然伊无犯错,ē-sái讲是人民并无学tio̍h伊ê模样,chit点是唯一可惜ê。第2节讲伊「不参与圣殿ê礼拜」,意思是讲in老父亲自执行祭司ê工作ê tāi-chì,伊无学tio̍h。可能是伊看tio̍h老父乌西雅因为强ài做祭司chiah thang做ê事,结果感染了癞ko,chit件事hō͘伊非常节制,m̄敢妄为。

重新查询 专卷研经 历代志下系列
错误回报,请联系comm[@]fhl.net