历代志下 26章1节 到 26章15节   背景资料  上一笔  下一笔
Chit章记载有关亚玛谢ê kiáⁿ乌西雅执政ê情形。历代志作者kā一位君王ê好kah pháiⁿ分做两个部分记载,乌西雅ê记事就kah第廿四章有关伊ê阿公约阿施,以及in老父亚玛谢仝款,lóng是分做两段记载,前段记载伊可取ê部分,后半段则记载伊背叛上帝ê行为。Tī美好ê部分必定带有上帝ê赐福,m̄-koh tī背叛上帝ê部分,必定会有严厉ê惩罚紧tòe其后。

乌西雅王thang讲犹大国执政siōng久长ê一位君王,tùi主前791到739年,共计长到52年之久,Tī chit段超过半世纪ê统治期间,国政稳定,因为án-ne,伊thang大兴水利、农事、国防等。乌西雅对犹大siōng重要ê贡献,是对抗非利士人真成功,而且修复了in老父因为被以色列王约华施phah败而被拆毁ê耶路撒冷城墙。

Chit段经文记载有关乌西雅好ê部分,就是伊忠于上帝,做上帝认为对ê事。因为án-ne,上帝赐福hō͘伊,tī伊治理之下ê犹大koh重振国威。

第1到2节,乌西雅继承in老父亚玛谢ê王位,hit时chiah 16岁,伊就kā老父所攻落来ê以东重要城镇以拉伊重新修建,chit对犹大来讲真重要,因为chit-ê城镇是一个海港城镇,是前往非洲kah阿拉伯等地区ê交通、运输要道,有非常高ê战略、经济价值。

第3到5节,chit段经文中所提起ê宗教顾问撒迦利亚是甚么人?并无清楚。显然ê,chit位宗教顾问对乌西雅帮助真chē,hō͘伊知影怎样遵守上帝ê话语,ná亲像tī大祭司耶何耶大辅佐之下ê犹大王约阿施时代仝款。

第6到8节,chit段经文描述乌西雅ê战绩,m̄-nā phah败非利士人,mā降服了亚扪人,以及阿拉伯人等,in lóng纷纷来向乌西雅进贡,表示臣服ê意思。

第9到10节,乌西雅m̄-nā tī军事上有好ê防御工事,而且tī经济上mā非常重视。伊推广农事,hō͘农作生产增多,mā增加人民ê财富。

第11到15节,因为有充沛ê经济活动力,hō͘伊thang拥有chē kah「三十万七千五百名ê兵丁」,以及「两千六百名军官」,chiah-ê军队lóng是随时thang派上战场,而且lóng是ē-tàng征善战ê勇士。因为有好ê经济能力,所以chiah-ê军队lóng有真好ê武装配备。Koh khah重要ê,因为伊对上帝忠心,因为án-ne上帝帮助伊。

重新查询 专卷研经 历代志下系列
错误回报,请联系comm[@]fhl.net