提摩太前书 3章1节 到 3章16节   背景资料  上一笔  下一笔
Chit章进一步讲tio̍h ài做一个教会领袖,应该有ê基本要件。教会是一个信仰团体,教会干部ê条件kah一般民间社团对领导者ê要求自然有无仝,若无,信仰团体就无法度凸显出它ê信仰意义。Koh讲,教会既然是一个信仰ê共同体,就m̄是用某一个人siōng大,á是某一个人siōng重要,却是用信仰为基础来治理、维持教会秩序。

第1节,《现代中文》用「教会领袖」,tī《中文和合本》用「监督」。希腊文chit-ê「领袖」ê字是用「episkopos」,并无一定kan-taⁿ用tī教会ê组织中,tī一般机构中mā用来形容有分担重要责任ê工作者。亲像tī历代志上第廿四章19节,就是teh指hiah-ê参与协助以色列人ê公共事务者。Á tī教会中使用「领袖」是kah一般机构无仝,因为教会是用信仰做基础ê团体,ài面对ê是上帝,并无亲像一般社会机构有所讲ê董事会、法院,á是koh khah高层ê机构来管辖。

约翰・加尔文用「长老」而m̄免「监督」是有原因ê,因为这kah旧约时代以色列人ê长老比较接近其意,「长老」是tī族群中lóng受尊崇ê人,thang tī法庭上担任审判官ê工作,mā是部落中有影响力ê人。Án-ne咱thang明白,长老ê由来背景,基本上就是beh有能力处理教会chit-ê信仰团契之间ê问题。Koh讲,长老lóng是lóng受众人尊敬ê人。长老教会ê「长老」则有两层ê意义,其一是teh指「传道」ê长老,另外一个是teh指「管理」ê长老。

第2到3节,chit两节经文提起chiah-ê担任所谓「教会领袖」ê人,一定tio̍h有ê基本生活行为。要件包括:

一是「只有ē-tàng有一个bó͘」。表面上是teh指男性,其实mā是适用tī女性。Koh讲,chit句话主要ê意思,就是teh指bē-tàng发生婚外情。

二是生活tio̍h顶真,m̄-thang放荡。

三是「真gâu教导」。Chit点有一个基本要件,就是所教导人ê tio̍h正确,却m̄是随家己ê意思á是认知。使徒保罗写hō͘提多ê信中就án-ne讲:「伊
一定tio̍h 坚守hit-ê 真实koh 符合教义ê信息,chiah ē-tàng 用端正ê 教示来劝勉人,mā ē-tàng 反驳hiah-ê 反对ê 人。(全民版)」(提多书一:9)

四是不贪爱钱财。因为贪慕钱财ê人,就是对上帝无够额ê信心,mā是对上帝无够忠实,伊讲chit种人等于「拜偶像」(参考以弗所书五:5,歌罗西书三:5)。

第4到5节,使徒保罗提供了一个非常重要ê认bat:建造教会ê基础,是tùi建造家庭生活开始做起。因为真正ē-tàng hō͘福音事工传达出去ê,就是tùi美满ê家庭生活见证开始。

第6节,chit节非常重要,因为tú进入教会ê人,tī信仰基础上并无成熟,这是thang明白ê。使徒保罗án-ne讲,并m̄是否定有kóa人确实真适合,虽然in ê信仰年龄真短,而真正有信仰根基ê人,并无认为一定会有甚么职位chiah愿意出来事奉教会ê工作,却是只要有需要伊参与ê,伊就会认真投入事奉。

使徒保罗所担心ê是,有kóa人tú接触信仰无久,就被选做教会ê领袖,深惊因为án-ne而「心高气傲」。一个人若tī信仰上án-ne,he会hō͘福音ê功效失去。Chia所讲ê「心高气傲」,原来ê意思是teh指「被浓浓ê烟罩tòa」。一个人若是进入浓烟密布ê中间,一定会看bē清楚状况。一个人若是「心高气傲」,对tāi-chì ê认知就会分bē清楚,chit种人真oh正确来处理教会事务。

第7节,tī教会外「有好声望」。Chia所提起ê「教会外」,意思就是teh指tī非基督徒中间。Mā就是讲,基督徒tī无信耶稣ê人ê眼中,应该ài有好ê评价。

长老教会创会者约翰・加尔文非常强调:基督徒应tùi工作职场中见证福音,原因mā是tī chia。因为工作本身就是siōng好传福音ê机会,若是tī工作上无尽责,就是遮盖了福音ê光芒。

第8节,tùi chit节到第13节ê chit段经文,是讲tio̍h帮助教会领袖治理教会ê「助手」。「助手」chit-ê词,tī《台语汉字本》、中文《和合本》、天主教《思高圣经学会晓版本》等圣经,lóng是用「执事」。所谓「助手」(á是执事),tī希腊文原来ê意思是teh指「奴仆、服务人员」(diakonos)。若以一般社会大众teh用ê名词来讲,「执事」就是teh指hiah-ê服务人员ê意思。使徒保罗kā「执事」用来设置tī长老ê位阶之下。这并m̄是讲执事比较低阶,却是指「助手」,是帮助者ê意思(参考使徒行传六:1—7)。Chit节讲起「助手」应该有ê品格,包括讲话诚实、不贪杯(指m̄-thang酒狂ê意思)、不贪财等。
第9节,chit节使徒保罗koh一pái提起「清白ê良知」,这是非常重要ê信仰功课。表示对信仰有明确ê认知,只有án-ne chiah ē-tàng tī信徒发生信仰问题ê时,知影怎样协助信徒明白正确ê信仰。Chia所讲「信仰ê奥秘」,指ê是有关圣经正确ê教导。

第10节,使徒保罗tī chia提出身为教会领袖ê助手,应该「先受考验」,主要原因是执事ê工作所触kah ê,lóng是kah信徒siōng直接ê教会事务,亲像教会财物ê管理,以及关怀等事,lóng kah信徒有直接关系。因为án-ne,若是经过一段时间了后,感觉妥当chiah thang被选做长老á是监督。

第11节,chia提起「in ê bó͘」,有ê翻译成「女执事」(参考中文《和合本》译文),mā有ê翻译做「cha-bó͘人」(参考《台语版》,kah天主教《思高圣经学会晓版本》ê译文)。M̄-koh tùi希腊文「gunaikas」chit-ê字来看,是teh指助手á是执事ê bó͘,并无错。使徒保罗tī chia主要用意是提醒教会领袖ê助手á是执事ê bó͘,tio̍h成做丈夫ê帮手,协助料理教会ê事务。因为bó͘会jōa-chē tùi丈夫嘴中知影教会发生ê事,因为án-ne,使徒保罗特别提醒做bó͘ ê,m̄-thang kā所听tio̍h ê话á是tāi-chì,随便传播讲出去,因为无正确ê传言真容易造成koh khah chē ê伤害。

第12到13节,kah教会领袖长老仝款,chiah-ê助手á是执事对家己ê家庭应该有好ê生活见证。

Tùi chia thang看tio̍h使徒保罗非常重视家庭生活和谐ê重要性。如果一个家庭不时teh吵闹,就真难得有好ê信仰见证。不时发生吵闹ê家庭,真oh kah别人讲述耶稣基督ê疼。任何一个美满生活ê家庭,lóng是人人羡慕ê对象,只要是有美满家庭生活,就是见证福音siōng有力ê基础。

第14到15节,tùi chit两节经文ē-tàng看出使徒保罗写chit张phoe ê目的;伊对以弗所教会确实有一份真特殊ê感情,伊希望ē-tàng够赶紧到以弗所教会去看māi,当然mā teh关心伊得意ê门生提摩太tī hia牧养工作ê情形án怎。使徒保罗tī chia讲「教会」就是上帝ê殿。伊tī chia所用ê「家」一字,tī希腊文是用「oikos」,chit-ê字指ê是「大家庭」ê意思,是真chē人,而且in并m̄是来自仝款血缘,却是根据共同信仰组成ê。Koh讲,chit-ê「家」ê另外一个重要信仰认bat,是「永远活ê上帝ê教会」。Á「永远活ê上帝」,主要是teh表示chit位上帝是一切性命ê来源,mā是万物ê创造主。

Chia使徒保罗提起第二个重要观念,就是由基督徒组成起来ê「家」就是「教会」。Chia ê「教会」,希腊文是「ekklesia」。Chit-ê字ê意思,是讲有一阵被拣选出来ê人。使徒保罗用chit-ê字,当然就是teh指基督徒就是hō͘拣选出来ê人。

Koh讲,chit句「真理ê柱石kah基础」,真清楚讲出被拣选成做基督徒ê使命,就是beh为真理做见证。这同时mā说明教会存在ê主要目的,是为tio̍h beh传扬上帝拯救ê真理,而这真理就是耶稣基督。

第16节,chit节是一首o-ló诗歌。Chit首诗歌mā为第9节所提起教会领袖ê助手á是执事应该持守「信仰ê奥秘」作了完美ê解释。Chit节thang参考腓立比书第二章6到11节。使徒保罗Tī chit首诗歌中提起几点重要ê认bat:

一、上帝是用人ê形体出现。这mā是基督教会接受三位一体上帝中所讲ê「子上帝」,耶稣基督就是上帝以人ê形像出现tī人类世界上,为tio̍h beh hō͘咱透过耶稣chit位「子上帝」看见父上帝ê荣耀。

二、tī圣神里称义。Chit句话ê意思是teh指耶稣基督虽然hō͘人钉死tī十字架上,m̄-koh,上帝却藉tio̍h伊死tī十字架上,hō͘信耶稣基督ê人,因为圣神ê气力,接纳耶稣基督为性命ê主,藉这会得thang kah上帝「和好」(称义)。这就是三位一体ê第三要义所讲ê「圣神上帝」。意思就是一个人ē-tàng明白耶稣基督ê救恩,并m̄是因为人有甚么能力,á是人thang做甚么好事,却是因为上帝tī耶稣基督内面ê疼,透过圣神ê做工,感动人ê心,hō͘人愿意接受耶稣基督为性命ê主。

三、「被众天使看见」。Chit句话thang tùi耶稣基督降生,直到耶稣基督死去koh活ê时,lóng有天使做见证者来了解。

四、「被万邦传扬,被世人信仰」。这mā讲出福音传扬到世界各地,而且突破了族群中ê界线,无koh有犹太人kah外邦人ê分。只有án-ne,chiah ē-tàng kā它称做「万邦」。

五、「被接到天顶」。Chit句话看起来kah-ná无甚么,m̄-koh却为耶稣基督koh再临提供了一个重要ê信仰告白。耶稣基督升天,这是使徒行传第一章9节、11节记载ê实况。Mā因为án-ne,基督教会久长以来,一直深信tio̍h耶稣基督必定会koh来临。

重新查询 专卷研经 提摩太前书系列
错误回报,请联系comm[@]fhl.net