撒母耳记上 8章1节 到 8章9节   背景资料  上一笔  下一笔
Tùi第八章开始到第十二章,lóng是绍介以色列君王制度ê形成。作者用chit段君王制度ê形成过程,同时teh探讨这历史事件kah信仰上引发ê冲突;这冲突是一方面以色列人民要求设立君王(八:5、19—20),另外一方面则设立君王teh表明以色列人民无意爱上帝为in ê王(八:7;十:19;十二:17、19)。

其实,有关设立君王制度ê背景kah原因,tī撒母耳记就有两种传统;第一种,认为这是出tī上帝ê意思,上帝亲自ài撒母耳设立君王来带领以色列人。Chit种传统观点tùi第九章ê记事thang看出来。第二种,是以色列人tī君王制度设立了后,感觉非常失望。Chit种传统tùi第八章、第十章17节到第十二章ê经文,真明显讲出以色列人认为chit种君王制度所带来ê,只是koh khah chē ê贪污kah违背上帝旨意。因为án-ne,thang了解:撒母耳记是由无仝ê资料编撰而成ê,并m̄是出tī仝一个种资料。Á chit种交织做伙ê资料,有时看起来会hō͘ 读者感觉kah-ná tī先知撒母耳身上有矛盾ê所在,亲像tùi第八章ê描述,看tio̍h先知撒母耳是抱tio̍h无仝意设立君王ê观点,这tī第十五章10到11节,伊对上帝后悔立扫罗为王ê事,表现出无仝意ê态度。先知撒母耳有chit种心结,tī一般以色列人中间mā是án-ne。特别是北国以色列人民,对所罗门王传承王位hō͘家己ê kiáⁿ罗波安,就表现出m̄ kah苟同ê态度,这thang tùi历代志下第十章12到19节看出。

Mā tùi以色列人民要求设立君王带领in chit件事,看出迦南地人民tī政治制度上比以色列人民ê族长制度koh khah现代化真chē。In一再强调讲「请替阮立一位王,治理阮,kah其他国家仝款」(八:3、20),这说明以色列人民tùi游牧生活进入高度农业社会ê迦南地,m̄-nā学习tio̍h种作ê生活方式,mā tùi chia学习tio̍h新ê社会制度。虽然是人民要求设立君王,m̄-koh,膏立国王乃是由上帝ê奴仆撒母耳执行,这是一个特点表明膏立ê行动出tī上帝ê旨意,达成人民ê要求。

Kui本撒母耳记上,记载先知撒母耳ê记事并无chē,除了第三章记载伊hō͘ 上帝拣选成做先知,然后就是第七章记载伊án怎帮助以色列人民「lóng向上主求助」,除去所有ê偶像神明,专心事奉上帝(参考七:4),并且mā带领以色列人民óa靠上帝。因为án-ne,以色列人民chiah ē-tàng tī上帝ê帮助下,kā前来攻击ê非利士人击退。Á chit段经文所描述ê ná亲像祭司以利ê kiáⁿ不学好仝款,chit-má是先知撒母耳ê kiáⁿ并无学tio̍h老父ê模样,只知影对钱财存贪婪ê心,结果被以色列人民拒绝。以色列人民为tio̍h án-ne要求先知撒母耳为in设立君王来带领in。

第1到3节,chit三节讲出年老ê先知撒母耳ê家庭问题。伊明知影家己ê kiáⁿ无好,却iáu立家己ê kiáⁿ当「士师」。M̄-koh真正士师,并m̄是家己讲ài做就当,ná亲像先知并m̄是家己讲了算数,却是有上帝ê选立chiah会有上帝赐福hō͘ in ê气力。因为án-ne,先知撒母耳家己立kiáⁿ当士师,并m̄是出tī上帝ê手。伊ê chit两个kiáⁿ却只知影贪婪,m̄知珍惜身分。

第4到6节,以色列人民ê代表(长老)为tio̍h án-ne chhōe先知撒母耳,向伊告状伊kiáⁿ ê恶行,并提出希望ē-tàng亲像迦南人仝款,有君王来治理以色列人民。为tio̍h án-ne,先知撒母耳真无欢喜ê向上帝倾诉。

第7到8节,chit段经文是上帝回答先知撒母耳ê问题。Ná亲像头前提起ê有两种传统看法,一种是支持ê另外一种是反对君王制度。Tī chia是反对君王制度ê传统,认为反对先知撒母耳,就等于反对上帝仝款。因为先知是上帝ê奴仆,何况先知撒母耳是带领以色列人民归向上帝ê主要领导者。作者指出以色列人民真正ê问题是去拜别ê神,而这mā是kui本撒母耳记ê中心议题。士师ê出现,就是以色列人民弃sak上帝,受tio̍h外族攻击而陷入苦难中ê时,in恳求上帝怜悯、带领in,上帝chiah拣选奴仆来管理in。Chia特别提起出埃及ê事件,因为有上帝ê恩典,带领以色列人出埃及,chiah ē-tàng hō͘ in会得thang进入流奶kah蜜之地ê迦南地。即使是án-ne,tī旷野流浪ê时,in mā bat因为等bē-tio̍h摩西tùi山顶落来,就背叛了上帝(参考出埃及记三十二:1)。

第9节,上帝同意in,chit种同意是一种「chhut-chāi」ê意思,因为in无koh听从上帝ê话,bē记得上帝ê恩典。M̄-koh上帝ài先知撒母耳提醒in beh为设立君王制度付出代价。


重新查询 专卷研经 撒母耳记上系列
错误回报,请联系comm[@]fhl.net