Tùi第五章到第七章1节，chit段经文是记载上帝ê约柜被非利士人抢夺去了后，所发生ê各种状况，hiah-ê状况hō͘非利士人大感不安，并且in认为所遭遇ê各种病症mā lóng是因约柜所引起ê。因为án-ne，非利士人主动地kā上帝ê约柜koh送tńg去hō͘以色列人。

约柜是耶和华宗教ê「圣器」，表面上看起来无甚么特别，实际上它是代表上帝之圣物。既然是上帝ê圣物，就bē-tàng用随便ê态度处理，这是非常重要ê一个认bat。Ná亲像圣殿是敬拜上帝ê所在仝款，虽讲并无表示上帝一定tòa tī其中，m̄-koh既然是属tī敬拜上帝ê所在，就应该tio̍h用敬虔ê态度看待。若无，kan-taⁿ会惹起上帝koh khah大ê愤怒，而带来严厉ê惩罚，ná亲像玛拿西王tī圣殿里做上帝无欢喜ê事，tùi án-ne引起上帝发怒，降灾惩罚in（参考列王记下廿一：1—6）。

Chit段经文主要teh说明：约柜虽然kan-taⁿ是一个神圣之记号，m̄-koh却teh代表是耶和华上帝。任何亵渎神圣上帝ê行为，lóng会受tio̍h严厉ê惩罚。

第1到5节，chit段经文讲非利士人掳获上帝ê约柜后，就带tńg来家己ê城市亚实突城，这是非利士人五个城市中ê一个，其余四个是：亚实基伦、以革伦、迦特、迦萨等（参考六：17）。古代社会，每一个城市lóng有各自ê守护神。Chia提起亚实突城ê守护神就是「大衮神」，这神mā是迦南人所敬拜ê神明巴利神明ê老父，mā是非利士人主要ê神明。被供奉tī迦萨，参孙tī迦萨ê大衮神庙中，最后摧毁了当时在场ê非利士人（参考士师记十六：21-30）。另外一点，古早时相刣，战败国ê重要神明mā常常是hō͘对敌ê一方抢夺ê重要物件之一，因为thang kā它当做献祭hō͘家己ê神明ê礼物。因为án-ne，非利士人kā约柜扛进大衮神庙里，mā teh代表讲：kā以色列人民ê神用来献祭hō͘大衮神。M̄-koh非利士人所想ê，tú好kah呈现出来ê景象颠倒；约柜m̄-nā无成做献祭hō͘大衮神ê祭品，反tńg是大衮神成做约柜ê「祭品」仝款，倒塌à。

第5到8节，koh khah惨ê，m̄-nā是大衮神像断裂四散tī土脚，连亚实突城kah周围村镇ê居民lóng因为án-ne连带受拖累，因为人民身上lóng长了「毒疮」，chit种病真亲像中世纪发生tī欧洲ê「乌死病」仝款，由老鼠传播ê病菌。为tio̍h án-ne，亚实突城派人去请其他四个非利人ê城市首领来会商，了后，决定kā约柜转移到迦特城去。

第9到10节，非利士人怎样想mā想bē到ê，当约柜转移送到迦特城了后，hit-ê城仝款地发生亚实突城人所遇tio̍h ê传染病「毒疮」。因为án-ne，in koh再kā约柜转送到另外一个城市—以革伦城，结果mā是仝款发生传染病。

第11到12节，因为án-ne，非利士人ê众领袖koh一pái会商，因为只要tó一个城市接放约柜，就会遇tio̍h严重ê灾难。非利士人即使是向in ê神明求救，mā是枉然。

Chit章经文已经清楚讲出，非利士人ē-tàng phah败以色列人民，m̄-koh，对神圣ê约柜，这象徵上帝威严ê记号是绝对bē-tàng亵渎。任何亵渎上帝ê神圣ê人，即使有koh khah大ê能力，mā会遇tio̍h上帝严厉ê惩罚。