撒母耳记上 31章8节 到 31章13节   背景资料  上一笔
Chit段经文记载非利士人用真残酷ê手段对待战死沙场ê扫罗,m̄-koh有情义ê雅比城居民却想办法kā伊ê尸体取落来火化并且kā骨灰埋葬,表达对扫罗ê感恩。

第8到10节,非利士人到沙场上去剥被刣ê战士ê战袍,这是古代打仗胜利后一定有ê动作,特别是战袍真重要。因为棉袍上有真chē ê护身设备,亲像铁片、刀剑、弓箭等,chiah-ê物件通常lóng是众士兵ê 随身ê物,tī当时lóng是属tī真贵ê战争物资。结果chiah发见扫罗kah伊三个kiáⁿ ê尸体。In看见扫罗ê尸体就kā伊ê头hō͘割了落来,这kah大卫割落代表非利士人ê歌利亚ê头是仝款ê意思(参考十七:51、54)。M̄-koh chit节ê记载kah撒母耳记下第一章10到16节ê记载无仝;tī撒母耳记下是讲kā扫罗ê头割落来ê,是一位亚玛力人ê少年人。伊割落扫罗ê头,原本是为tio̍h beh去向大卫请功领赏ê。结果m̄-nā无the̍h-tio̍h奖赏,反tńg被大卫以刣死上主选立ê王下命令刣死。In he样做,除了是派人去分报消息hō͘人民外,mā报hō͘ in ê神明知影,续落来koh kā扫罗ê武器khǹg tī女神庙中,kā扫罗ê尸体钉tī「伯・珊」得城墙上。Chit种作法mā是古代侮辱战败对敌阵营者ê一种方法,mā是当时ê人siōng惊惶ê一种惩罚方式—曝尸。是hō͘尸体曝tī日光下,真容易就会发臭、生蛆,用chit种方式来侮辱敌人。其实,chit种方式mā是teh亵渎敌人,hō͘ in ê心灵受tio̍h严厉ê创伤。古代ê人mā认为一个人死后,若是无法度安葬,会无法度hō͘后代得tio̍h幸福(参考列王记上十六:4)。

第11到13节,「基列境内雅比城」,这是tī约旦河东,属tī玛拿西支族境内ê一个市镇。Chia ê以色列人抱tio̍h感恩ê心,想出所有ê办法kā扫罗kah伊三个kiáⁿ ê尸体tùi「伯・珊」ê城墙上「取落来,带tńg来雅比」,并且kā它火化à。In会án-ne做,可能因为扫罗bat带三十三万以色列军队,去抵抗亚扪人对hit-ê城ê恐吓kah侵犯(参考十一:8—12),雅比城ê人民以此表达in对扫罗救命ê感恩。

Chia有khah难了解ê所在,就是有关火化扫罗kah伊众kiáⁿ ê尸体,根据以色列人ê传统,kā尸体火化是一种惩罚(参考利未记二十:14、廿一:9,阿摩司书二:1)。M̄-koh,雅比城ê居民chit种火化方式处理扫罗kah三个kiáⁿ ê尸体,应该是用尊敬ê心chiah-tio̍h,in koh kā扫罗kah三个kiáⁿ ê骨灰埋葬tī「城里ê柳树下」。后来,大卫koh kā扫罗kah伊kiáⁿ约拿单ê骨骸,迁徙到故乡便雅悯境内ê洗拉,kah扫罗老父基士ê坟墓葬做伙(参考撒母耳记下廿一:13—14)。大卫只迁徙扫罗kah约拿单ê,原因是伊kah约拿单有「生死之交」ê特殊关系。当然,扫罗是上帝拣选ê君王,即使扫罗过去bat一直想beh谋害大卫,m̄-koh大卫iáu是照常持守尊敬上帝拣选ê君王,hō͘ in siōng koân ê尊敬。雅比城ê人民甚至为扫罗ê死「禁食七工」,表示hit-ê城ê人对扫罗siōng koân ê怀念。大卫后来tī听tio̍h扫罗ê消息ê时,mā仝款表现出以色列人siōng悲伤ê方式—拆裂衫裤、禁食(参考撒母耳记下一:11—12)。

结语:
Chit场非利士人kah以色列人tī基利波山ê战役,tī以色列ê官方历史mā有记载,而且内容差不多仝款(参考历代志上十)。比较值得注意ê是:历代志作者对扫罗kah伊kiáⁿ ê死,作了非常重要ê评语讲:「Án-ne,扫罗死亡,因为伊tī 上主犯罪,为tio̍h 伊无守上主ê 命令,koh因为伊去 chhōe 鬼附身 ê cha-bó͘ 人来问她,颠倒无问上主,所以,上主kā伊刣死,kā伊ê国归hō͘ 耶西ê kiáⁿ大卫。(全民版)」(历代志上十:13—14)
重新查询 专卷研经 撒母耳记上系列
错误回报,请联系comm[@]fhl.net