撒母耳记上 26章1节 到 26章12节   背景资料  上一笔  下一笔
Chit章kah第廿三章19到廿四章22节ê记事,是仝款ê内容,主要lóng是提起有关大卫确实有机会kah能力杀害扫罗,m̄-koh伊并无án-ne做。原因是大卫一再强调:bē-tàng杀害上帝所选立ê君王(参考廿四:6、10、廿六:11、23)。大卫强调一个中心思想:上帝选立ê君王,应该hō͘ in必要ê保护,若无,就是失职(参考廿六:16、24)。

其实,大卫chit种讲法mā是teh提醒扫罗,既然伊是上帝所选立ê君王,扫罗就算家己是君王,mā bē-tàng对大卫下手杀害。因为谋刣上帝选立ê君王,等于是teh对抗上帝,chit种行为kan-taⁿ会为家己带来上帝严重ê惩罚—死亡。

Chit章经文主要teh讲述大卫m̄-nā无杀害扫罗,反tńg iáu阻止伊ê部下杀害扫罗。

扫罗并m̄是真心地悔悟认为家己确实犯错。伊心中照常无法度释怀大卫会取代伊ê家族继承王位。Chit段经文koh一pái描述当伊接tio̍h情报知影大卫bih起来ê所在ê时,随时koh派出精兵beh去杀害伊。当大卫kah 随行者得tio̍h杀害扫罗ê机会ê时,大卫iáu是持守tio̍h chit-ê基本态度:bē-tàng伤害上帝所选立ê王。

第1到5节,ná亲像第廿三章所提起ê,西弗人可能因为受tio̍h挪伯遭遇扫罗大屠杀ê影响,当in知影大卫藏匿ê所在,随时向扫罗通报。Á扫罗听tio̍h chit-ê消息了后,马上率领「三千精兵」去搜chhōe,动作非常积极。Á大卫mā得tio̍h情报讲扫罗派兵beh来缉拿伊ê时chūn,马上派出探á去调查实况。这真有意思ê讲出一件事:大卫m̄是听tio̍h后就马上行动,tú好kah扫罗ê反应相对。伊是先派出探á去调查是m̄是事实,经过证实chiah采取因应ê对策。这表示大卫绝对bē冤枉扫罗,m̄-koh扫罗却一再冤屈伊ê忠chiâⁿ。伊mā phah听tio̍h完整ê情报,知影扫罗ê营地,知影扫罗困tī军营里。

第6节,「赫人亚希米勒」,这是圣经中唯一出现ê一pái。「赫人」chit-ê族群一直khiā起tī迦南ê南部,ē-sái讲是迦南地siōng凶悍ê族群。大卫ê部队中mā有「赫人」加入,亲像拔示巴ê丈夫就是「赫人乌利亚」(参考撒母耳记下十一:3)。这mā teh表示大卫ê军队是非常善战。亚比筛对大卫表示伊愿意跟tòe大卫去扫罗营区,这是非常冒险ê行动,若是无小心被发见,in两人lóng可能丧命。Á「洗璐雅」,是大卫ê姊妹,伊有三个kiáⁿ—亚比筛、约押、亚撒乌等(参考历代志上二:16)。Chit三个kiáⁿ lóng是大卫部队中ê勇kā(参考撒母耳记下二:17—18)。

第7到8节,当大卫kah亚比筛偷偷á进入扫罗ê营房内,发见伊iáu teh困,he是一个siōng好ê机会ē-tàng真简单to̍h杀害扫罗。

第9到12节,大卫阻止了beh杀害扫罗ê亚比筛,伊ê态度仝款,就是上帝所选立ê君王绝对bē-tàng杀害。伊深信上帝家己会惩罚违背他旨意ê扫罗,而且上帝会用各种无仝ê机会,有可能是亲像第廿五章36到38节所描述ê 拿八猝死,mā有可能会tī战场上死去。Chit pái大卫决定the̍h走扫罗随身ê矛,kah身上ê水罐做证据,ná亲像顶pái大卫割落扫罗身上ê袍之一角做证据仝款。大卫kah亚比筛完成chit件偷袭事件后就离开,扫罗kah所有军营ê人lóng iáu teh沉睡。

重新查询 专卷研经 撒母耳记上系列
错误回报,请联系comm[@]fhl.net