Chit段经文ē-sái讲是为扫罗当以色列国王ê时所做ê大事作一个简略ê绍介。

第47到48节，短短两节说明扫罗一生ê战绩，伊tī执政期间，ē-sái讲是不断来teh扩张领土疆域，巩固以色列边界ê安全。Chia并无详细描述出其他khah小族群ê挑衅，而只有讲出几个比较重要ê族群，包括有摩押人、亚扪人，in khiā起tī以色列ê东边地区；以东人，tòa tī以色列ê南边地带；非利士人则Tī西pêng，而琐巴人ê所在是tī北pêng。换句话讲，扫罗是带领以色列人民作全面性ê征伐，hō͘以色列人ê外患差不多lóng tī伊执政ê时代消除。第47节ê「无论伊上tó位lóng phah赢」chit句话，tī希伯来文原本是「无论伊上tó位lóng真邪恶（á是残忍）」。意思是伊对待敌人ê手路一点mā不仁慈。

第49到51节，chit三节经文mā是一份简单ê族谱。kā chiah-ê名对照第三十一章2节ê名单，就会发见chia少掉了「亚比拿达」（mā thang参考历代志上十：2）。

「亦施韦」，chit-ê名ê意思是teh指「上主ê人」。Tī历代志上第八章33节用「伊施・巴力」，就变成「巴力ê人」，这已经说明chit-ê kiáⁿ后来tī信仰上脱离了上帝，因为án-ne，tī撒母耳记下第二章8节伊ê名成了「他施波设」，意思是「罪恶ê kiáⁿ」。

第52节，tùi chit节thang看出以色列人民siōng麻烦ê仇敌就是非利士人。Mā为tio̍h beh防御非利士人不断来挑衅，扫罗无停地徵召强壮ê cha-po͘人入伍做兵。Chit节mā为第十五章、第十七章ê战事留作伏笔。