撒母耳记上 1章1节 到 1章8节   背景资料  下一笔
Chit章先绍介先知撒母耳出世ê家世背景,kah伊ê出世。Ná亲像东方社会ê妇女仝款,伊ê老母哈娜因为无生gín-á而感觉苦闷,上帝垂听伊ê祈祷,而伊下愿beh kā上帝赏赐hō͘伊ê gín-á撒母耳终生献hō͘上帝,果然照伊所下ê愿带撒母耳去祭司以利hia,hō͘撒母耳留tī祭司以利hia学习事奉上帝。

Chit段经文先绍介撒母耳ê父母kah家庭,mā thang看出早期东方社会,对不孕妇女ê鄙视(siùⁿ)。同时,chit段经文mā为撒母耳出世埋落来伏笔,beh说明后来哈娜透过祈祷,上帝垂听伊ê祈求,hō͘伊有娠生撒母耳。M̄-koh伊koh下愿kā撒母耳奉献hō͘上帝,因为伊求ê,是beh除去不孕ê耻辱。

第1到2节,「以法莲山区」、「以法莲支族」,thang参考约书亚记第廿一章20节,就会发见属tī利未支族ê哥辖宗族,tùi以法莲支族ê土地分得一kóa城khiā起。因为án-ne,chia虽然讲以利加拿是属tī「以法莲支族」,m̄-koh ná亲像约书亚记所讲ê,伊是利未族人,tùi以法莲支族分配得tio̍h以法莲所在ê城市khiā起。根据历代志上第六章33到34节ê记载,撒母耳、以利加拿 lóng是利未族人。摩西律法非常清楚规定,只有利未族人chiah ē-tàng担任祭司ê工作(参考民数记三:5—13)。

Chia讲以利加拿每年lóng tùi「拉玛」到「示罗」去敬拜上主,这是因为以色列男子每年至少ài有三pái到所谓「一个特定ê场所」(参考申命记十二:5、11、14、18、21、26;十四:25;十五:20;十六:2、5、11、15、16)敬拜上帝,chit三个节期就是包括Pôaⁿ过节在内ê除酵节、收藏节、收成节等等(参考出埃及记廿三:14-19)。Á「示罗」是当时ê宗教中心,约柜就khǹg tī hia(参考约书亚十八:1,士师记廿一:19)。

以利加拿有两个bó͘,真可能是因为原配bó͘「哈娜」无生育,伊koh再娶「比尼娜」做bó͘,这tī早期社会非常普遍,因为无法度有娠ê妇女,tī家族中会hō͘藐视,地位差不多kah「女婢」仝款,而且会hō͘ ē-tàng有娠生kiáⁿ ê 妻妾欺负,亚伯拉罕ê bó͘撒莱就有chit种经历(参考创世记十六:4)。「哈娜」chit-ê名ê意思是teh指「恩典」,而「比尼娜」意思是teh指「珍珠」,表示伊tī以利加拿ê家族中享受ê地位,ná亲像「珍珠」hit种ê贵重。原因是伊ē-tàng有娠生kiáⁿ ê缘故。

第3到5节,以利加拿照规定lóng会teh献祭了后,分配所得tio̍h ê祭物hō͘伊ê bó͘,伊真疼哈娜,虽然伊无法度生育,伊并无因为án-ne就鄙视(siùⁿ)伊。

第6到8节,因为哈娜无法度有娠而遇tio̍h有生gín-á ê另外一个bó͘比尼娜嘲(sau)笑、侮辱,hō͘哈娜艰苦心到极点。因为án-ne,伊向上帝祈祷,甚至祈祷到流目屎而m̄食物件,这tī大节期中án-ne悲伤引起丈夫以利加拿 ê关注。

重新查询 专卷研经 撒母耳记上系列
错误回报,请联系comm[@]fhl.net