Chit段经文讲述哈娜ê祈祷确实得tio̍h上帝ê应允，撒母耳就án-ne出世，而哈娜mā依家己所下ê愿，kā撒母耳献hō͘上帝。圣经作者一再强调，向上帝下愿了后，一定tio̍h照所下ê愿去还愿。摩西律法中ê民数记第三十章就非常清楚写着有关下愿kah还愿ê条例，教导以色列人民，若是向上帝下愿无照所下ê愿iáu清，就是「犯罪」（参考申命记廿三：21—23）。

第19到20节，果然，上帝注意听哈娜ê倾诉kah烧热切ê祈求，赏赐hō͘她有娠，而且生一个kiáⁿ，哈娜为chit-ê gín-á号名「撒母耳」，意思是「上帝ê名」，mā表示「是tùi上帝求来」ê意思。

第21到22节，早期以色列人讲「gín-á断奶」，通常是tī三岁左右。过去每年lóng kah丈夫以利加拿去示罗献祭ê哈娜，chit pái并无跟tòe丈夫去献祭，伊表示等gín-á断奶后就beh还愿，kā gín-á留tī示罗祭司以利hia，kā gín-á终生献hō͘上帝。

第23到28节，以利加拿知影哈娜ê心意，mā知影he是伊向上帝下愿所生落来ê kiáⁿ，因为án-ne，伊同意bó͘哈娜照所下ê愿去行。确实在三年后，kiáⁿ断奶了，哈娜就带所准备ài还愿ê祭品到示罗敬拜上帝ê所在。哈娜kā gín-á撒母耳交hō͘大祭司以利，表示撒母耳会终生归属tī上帝。Á大祭司以利一定tio̍h接受，因为这是还愿ê「奉献」无法度拒绝。