彼得前书 5章1节 到 5章14节   背景资料  上一笔
早期教会tī信仰上tú-tio̍h极大ê迫害,致使有bē少信徒因为án-ne丧失性命,mā有bē少信徒性命tú-tio̍h极大ê苦难,就án-ne使徒ê书信中就一再鼓励信徒,tio̍h坚忍到底,并且kā in讲:对hiah-ê到死lóng坚持无变ê信仰者,上帝必定会hō͘ in siōng美好ê奖赏—上帝beh成做in ê上帝,beh亲自牧养in,并且hō͘ in享受永恒ê性命(参考启示录七:15—17)。诗篇第廿三篇非常清楚表达上帝就是牧者,以色列民族就是上帝ê羊群。Tī上帝chit种好牧者带领之下,属tī上帝ê子民之羊群,m̄免担忧生存ê问题,mā m̄免惊惶tú-tio̍h性命ê困境,因为有上帝teh庇护、teh带领。

Chit种以上帝亲自当顾羊人来牧养chiah-ê属tī他ê羊群,就是以色列人民一直存在ê信仰认知:上帝是in民族ê顾羊人;in是属tī上帝ê羊群。上帝亲自牧养,等于teh说明性命无koh有苦难,mā bē有任何惊惶,因为上帝就是赏赐性命ê主,mā是siōng好ê庇护者。先知以西结就bat tī伊hit时代提出上帝就是以色列人民ê牧者chit种看法,hō͘ in bē「tī暗无天日、多灾多难ê时chūn被赶散到各地」,m̄-nā án-ne,上帝iáu要领in「tńg来到以色列ê山间kah溪畔,tī青绿ê草场牧养in」,hō͘以色列人民thang安心生活。先知以西结传出上帝对以色列民族siōng重要ê一句宣告就是:「『Lín 是我ê 羊,是我草场ê 羊;lín 是人,我mā 是lín ê 上帝。』这是至koân 上主讲ê (全民版)」(以西结书三十四:31)

	耶稣基督就bat用chit种顾羊人kah羊群之ê亲密关系,来形容伊kah跟随者之间bē-tàng分离ê情景(参考约翰福音十:1—16)。伊甚至讲tio̍h好ê顾羊人会为tio̍h羊群ê安全而牺牲家己ê性命。

    彼得前书作者chit-má mā用chit种顾羊人kah羊群之间ê特殊来勉励信徒,tio̍h学习做一个好ê顾羊人来对待所有ê羊群。

第1节,chia提起「长老」chit-ê词,就ē-tàng看出早期教会已经发展出一个真有系统ê组织,「众长老」m̄-nā是教会中ê中流砥柱,mā同时看tio̍h「长老」tī早期教会里已经扮演非常重要ê角色(参考使徒行传十一:30、二十:17)。至少thang看tio̍h「长老」tī当时已经是牧养教会ê工作者。

使徒保罗tī早期开拓教会ê时,mā是用「长老」ê制度来管理教会,伊对教会tī推选「长老」ê事顶面有严格规定(参考提摩太前书三:2—7,另外参考提多书一:6—9)。使徒保罗每传福音到一个所在,成立教会了后就会设立长老来牧养该教会(参考使徒行传十四:23,提多书一:5)。因为án-ne,thang理解早期ê教会有长老并m̄是真稀奇ê事。

M̄-koh tio̍h注意ê是彼得前书ê作者特别强调家己是基督受苦ê见证人,这是非常重要ê一件事。伊并m̄是khah强调家己ê权柄,而是beh见证耶稣基督ê受苦。

彼得前书作者讲beh kah大家「分享将来ê荣耀」,表示chit种荣耀是属tī未来ê,并m̄是目睭前看会tio̍h ê。作者用chit种方式teh说明一件事:如果见证耶稣基督ê苦难而受难,则chiah-ê苦难lóng会成做将来耶稣基督koh再临时,要领受耶稣基督koh活之荣耀ê证据。

第2节,「牧养上帝所付托lín ê羊群」,而且一定tio̍h出tī「甘心乐意」,这mā是献身传道ê第一要件。使徒保罗描述耶稣基督是:「他颠倒piàⁿ 空家己,取奴仆ê 身分出世做人,成做人ê 形体出现。他自愿谦卑,顺服到死,甚至死tī 十字架顶。(全民版)」(腓立比书二:7—8)这mā是为甚么伊ài大家学习耶稣基督ê chit种心境(参考腓立比书二:5),因为án-ne ē-tàng hō͘福音成做甘甜ê果子。

Koh讲,因为有甘愿献身之心,人chiah会不计较报酬jōa-chē,mā chiah会「自动自发ê事奉」,chit点是非常确实ê。只有不心甘情愿之下,人就真会计较。这tùi使徒保罗ê书信中thang看出一kóa看出,就是早期教会中有kóa长老担任tio̍h传道ê工作并m̄是真心甘情愿,á是对金钱ê问题比较致意。使徒保罗非常清楚表示:传道者tùi教会信徒ê奉献得tio̍h生活ê所需要ê是正确ê(参考哥林多前书九:3—14),伊甚至讲:「Gâu 治理教会ê 长老,tio̍h 加倍kā伊尊敬;对hiah-ê 特别尽力teh 讲道理kah 教示ê 长老,koh khah tio̍h án-ne。(全民版)」(提摩太前书五:17)m̄-koh使徒保罗却iáu-koh保持家己工作thàn钱以维持生活所需要ê,主要原因就是伊无希望有人chhōe孔缝,讲伊骗信徒ê钱,因为tī哥林多教会发生过chit种事(参考哥林多后书十一:7—9、十二:16—17)。伊会án-ne坚持ê原因,就是当时有kóa人利用教会信徒ê善心,表面上看起来是teh传道,其实是teh欺骗信徒ê钱财。Á是虽然是做传道者,m̄-koh却对金钱ê事真致意,án-ne是kā传道ê工作当做饲家庭生计ê一种方式。

第3节,好ê牧者就是羊群跟tòe ê对象。作者tī chia特别强调一个好ê传道者应该成做信徒学习ê「模样」。使徒保罗非常有名ê话语,就是伊bat写phoe hō͘ kúi-nā间教会ê时,lóng bat kā读伊书信ê人讲tio̍h学伊,ná亲像伊学习耶稣基督仝款(参考哥林多前书十:32—十一:1,腓立比书三:17,帖撒罗尼迦后书三:9)。

第4节,耶稣基督就是好ê牧者,chit点所有ê基督徒lóng清楚知影。作者tī chia提起chit位好牧者耶稣基督koh再临时,是带审判ê权柄来到世间,因为án-ne,每一个传扬耶稣基督十字架信息ê传道者,lóng一定tio̍h向耶稣基督交帐,chit时所有负起传道工作ê人,就会知影家己所得tio̍h ê是甚么款ê成绩。作者tī chia用「永远bē失去光彩ê华冠」,这就是使徒保罗siōng ài用ê属天之奖赏(参考腓立比书三:14,提摩太后书四:7—8)。
第5节,tī第1到4节提起教会ê「长老」,这字有ê时mā teh代表年岁比较高、而且有社会地位者。当然mā是teh说明带有传扬福音者ê身分。紧续落来就是提起少年人应该注意ê信仰态度。

作者tī chia引用箴言第三章34节ê话语所讲ê:「伊(上帝)看轻狂傲ê人,恩待谦卑ê人。」chit句话雅各书ê作者Tī该书信ê第四章6节bat引用过(另外thang参考约伯记廿二:29)。骄傲ê第一个特徵,就是拒绝别人ê意见,坚持己见,认为家己所做、所想ê lóng是正确ê。Tī教会里,chit种态度是真oh kah别人同工ê。作者特别提醒少年人应该对年长ê人有「谦卑顺服」ê态度。伊用「系上谦卑ê围裙」,chia ê「系上」,意思是teh指kā索á phah成有结ê款,án-ne就bē松开。换句话讲,如果无kā「谦卑」看做是一个人性命ê基本,ná亲像穿衫仝款,如果无穿好就真oh看à。仝款ê,一个人如果m̄-bat谦卑,只有骄傲ê话,hit-ê人所显现出来ê,lóng会是不堪入目的。奥古斯丁就讲过:「骄傲乃是万恶ê根源。」chit句话真有意思,mā值得咱注意。

第6节「大能上帝ê手下」,chit句话已经真清楚说明上帝是一个全能ê神。圣经讲宇宙万物就是tī上帝ê手下完成ê,tī上帝ê手中,无无法度成就ê事。Mā因为án-ne,只有谦卑ê人chiah会明白上帝chiah是性命ê主。做一个人骄傲ê时chūn,心中自然bē认为有上帝(参考诗篇十四:1),只有谦卑ê人,即使伊m̄-bat上帝,mā会知影有上帝存在,而且teh管理tio̍h宇宙万物等一切受造物。

第7节,这是引用诗篇第五十五篇22节。
耶稣基督bat对跟tòe伊ê人讲过,到伊hia thang hō͘性命ê负担减轻,hō͘性命得tio̍h安息(参考马太福音十一:28—30)。Chiah-ê「重担」指ê就是烦恼、烦恼、操心、愁烦等等,是hō͘人性命感觉困苦ê事物。Án-ne,任何人只要是接近耶稣基督,就会得tio̍h性命ê安息,会因为耶稣基督是性命ê主,会hō͘人ê性命活得koh khah轻快、有力。

「因为他(上帝)关心lín」,chit句话tú好讲出基督教信仰siōng大ê特质,就是kā咱讲:上帝是疼。充满爱ê上帝关心所有óa靠他救恩ê人。
第8节,tùi福音书中mā thang看tio̍h耶稣基督提醒跟随者tio̍h时刻「警醒」,原因就是kah末日来临,以及会tú-tio̍h ê苦oh得有关(参考马太福音廿六:41,马可福音十三:32—37),tī伊ê教导中mā一再提醒hiah-ê当奴仆ê,tio̍h「警醒」注意主人随时会来到(参考路加福音十二:35—38)。

Chia ê「魔鬼」,mā是teh指hiah-ê专门制造毁谤纠纷ê人。这thang到早期社会为tio̍h beh害基督徒,就用真chē方法来陷害,甚至用钱买做假证者陷害基督徒,chiah-ê ná亲像「魔鬼」ê陷害者,in tú亲像iau饿ê狮,teh chhōe「吞食」ê对象。因为án-ne,作者讲tio̍h小心chiah-ê「仇敌」,免得被伤害。

第9节,chia提起tio̍h用「坚定」ê「信心」来「抗拒」chiah-ê ná亲像「魔鬼」ê诱惑者,即使因为án-ne而受苦,mā tio̍h坚持落去。雅各书ê作者甚至讲只有chit种坚持,ē-tàng hō͘诱惑者á是陷害者知难而退。所谓「坚定」chit-ê词,通常是用tī军事战争中,kā战场上会阻碍抵抗ê所在lóng清除掉。

Koh讲,chit节mā说明为tio̍h福音ê缘故,tī基督教信仰历史上差不多全世界各地lóng仝款,记录了信徒受tio̍h迫害ê经历tùi m̄-bat间断过。作者用chit种话来安慰当时ê信徒,ài in感觉tī受tio̍h迫害中bē有孤独感。

第10节,chit节hō͘ tī受苦中ê信徒看tio̍h,tú-tio̍h ê苦难bē是久长ê,却是目nih-á ê。相对ê,将来ê荣耀却是永远ê。Chia作者特别强调,上帝乃是「赏赐一切恩典」ê上帝。所谓「一切恩典」乃是指新性命,mā就是永恒ê性命,án-ne chiah是所有恩典ê总和。因为有chit种恩典,ē-tàng抵挡会tiâu这世间一切ê苦难kah诱惑。Hō͘人ê心kah耶稣基督连结做伙,mā只有án-ne,ē-tàng kah耶稣基督同齐受苦来死,并且mā因为án-ne kah伊同齐享受koh活ê荣耀(参考罗马书六:5、8)。

第11节,ē-sái讲是chit本书信ê结尾,ná亲像tī第四章11节仝款。

第12节,thang看出chit封书信真可能就是使徒彼得ê助手「西拉」写ê,m̄-koh使徒彼得签了名,这ná亲像使徒保罗写ê罗马书仝款,是由德提代写,使徒保罗签名表示书信内容是根据伊ê意思写做ê(参考罗马书十六:22)。
「西拉」,伊就是耶路撒冷教会派去安提阿教会访问ê两人ê一,另外一位就是巴撒巴ê犹大,in两人lóng是耶路撒冷教会信徒所敬重ê代表,in受耶路撒冷教会使徒会议ê委托,去解释使徒会议所做成ê决议hō͘安提阿教会(参考使徒行传十五:22—29)。后来使徒保罗第二pái去旅行传福音,西拉接受使徒保罗ê邀请同行(参考使徒行传十五:40)。Tùi使徒行传中thang看tio̍h西拉真正是一位好ê福音伙伴,使徒保罗tī其它书信中lóng bat提起西拉ê名(参考哥林多后书一:19,帖撒罗尼迦前书一:1,帖撒罗尼迦后书一:1),伊m̄-nā帮助使徒保罗,mā tùi chit封书信中看tio̍h伊mā是使徒彼得好ê同工。

第13节,chia用「同蒙拣选ê巴比伦教会」chit句话,会hō͘读者感觉奇怪,因为chia用「巴比伦教会」,而tī希腊文圣经并无「教会」chit-ê词,而这「同蒙拣选」chit-ê词则用阴性ê句话,因为án-ne,有人讲这是teh指使徒彼得ê bó͘讲ê,因为使徒彼得就是带bó͘四界去传福音(参考哥林多前书九:5)。M̄-koh无法度确定是m̄是真正亲像án-ne?若是真正án-ne,伊为甚么kā家己ê bó͘譬喻做「巴比伦」?确实真oh理解。

Koh讲,若是「巴比伦」ná亲像启示录作者用来譬喻tio̍h罗马ê话(参考启示录十六:19、十七:5),用「巴比伦教会」chit-ê词,mā是teh保护当时受迫害ê教会,ná亲像启示录仝款,无想beh hō͘人一看马上知影是写hō͘罗马帝国统治之下当teh受迫害ê基督教会信徒看ê书信。

Chit节mā提起「马可」,作者并且讲是「我ê kiáⁿ」,因为án-ne,有kóa圣经学者认为chit位「马可」就是马可福音作者,因为kah彼得关系匪浅,因为án-ne,马可福音就是tī使徒彼得口述之下,马可写做ê,因为án-ne马可福音teh记述有关耶稣基督ê事迹上,尤其是有关使徒彼得ê事顶面,记载kah真详细。M̄-koh另外有人认为chit-ê「马可」真可能真正就是使徒彼得ê kiáⁿ。另外一种讲法,讲chit位「马可」就是使徒行传中ê「约翰・马可」,伊kah巴拿巴有远亲关系,m̄-koh tī第一pái被推荐陪同使徒保罗、巴拿巴去旅行传道ê时,tī半途kiu-kiu tńg来耶路撒冷,为tio̍h chit件事,致使使徒保罗kah巴拿巴闹翻了(参考使徒行传十三:5、13、十五:37—39)。不过后来chit位马可iáu是成做使徒保罗真好ê同工(参考歌罗西书四:10,腓利门书24节)。

第14节,chit种以圣洁ê「疼心彼此chim嘴」互相请问ê方式,mā是使徒保罗不时tī书信结尾ê时所用ê句型(参考罗马书十六:16,哥林多前书十六:20,哥林多后书十三:12,帖撒罗尼迦前书五:26)。

重新查询 专卷研经 彼得前书系列
错误回报,请联系comm[@]fhl.net