彼得前书 4章1节 到 4章19节   背景资料  上一笔  下一笔
作者tī chit章经文中,ài所有ê信徒明白因为耶稣基督ê受苦洁净、洗荡了所有信靠伊ê人ê罪,因为án-ne,就m̄-thang koh一pái堕落à。一定tio̍h teh生活胜有所节制、约束。好成做一个真正分别为圣ê上帝子民。

作者tùi信徒一定tio̍h tī家庭kah社会生活上有美好ê见证讲起,因为tī使徒ê时代,基督徒是真少数ê,而chit种少数tī一个社会中会显得特别抢眼,有真chē目睭注意在看tio̍h。如果小khóa不注意,真容易落入口实而亵渎基督徒ê信仰。因为án-ne,kā信仰用tī生活kah工作上,就成做众使徒tī早期教会生活中ê一项真重要之教导内容。Ná亲像使徒保罗所讲ê:「兄弟姊妹,所以, 我óa 靠上帝ê怜悯,劝lín 献家己ê 身躯做祭,是活ê,神圣ê,上帝所欢喜ê 祭;这是lín 诚心诚意ê 服事。(全民版)」(罗马书十二:1)

Tī chit章作者继续提起chit本书信ê主题—为tio̍h基督ê缘故受苦难,乃是一件荣耀ê事。因为án-ne,即使是受tio̍h迫害而tú-tio̍h苦难,mā tio̍h tī各方面lóng有美好ê见证。

    第1节,节thang参考第二章24节。

    彼得前书ê作者tùi开始就锁定「受苦」chit-ê题材,beh谈有关因为信耶稣基督而受tio̍h ê chit种迫害,tī每章经文lóng有提起基督徒若是因为信耶稣基督ê缘故而受tio̍h迫害ê时,应该有ê态度。

Chia ê「苦难」,kah耶稣基督tī十字架上ê死有关系,因为耶稣基督ê死,就是kā罪带上了十字架,hō͘罪mā被钉tī十字架上。Án-ne,信靠耶稣基督救恩ê人便bē koh再被罪缠tio̍h m̄放。Koh讲,作者tī chia呼吁信徒tio̍h学习耶稣基督chit种tī十字架上苦难ê样式,kā它看做是一种信仰ê功课来学习,这就kah-ná kā罪钉死tī十字架上仝款,因为耶稣基督就是kā人类ê罪带到十字架ê。因为án-ne,tùi信仰ê角度来看「苦难」ê时,对一个基督徒来讲,并m̄是一件pháiⁿ事,却是帮助基督徒学习成长ê机会。

第2节,ná亲像第1节所讲ê,学习耶稣基督tī十字架上ê方式,kā罪隔绝出来了后,chit种人第一个转向就是会顺服tī「上帝旨意ê管束」做tāi-chì,而bē koh再跟tòe引诱人犯罪ê「欲望」行。Chia ê「欲望」是用复数,表示有真chē、算bē完ê欲望。这表示诱惑人犯罪ê方式、力量真chē mā大,m̄-koh lóng会因为学习耶稣基督用十字架chit种苦难ê方式,thang真彻底kā罪隔绝出来。

第3到4节,chit两节就是tī讲tio̍h学习耶稣基督chìn前、后ê差别;tī chit chìn前,是跟tòe诱惑人犯罪ê欲望行。chit-má因为学会晓耶稣基督十字架ê样式,开始过着有节制ê生活。M̄-koh,却会因为án-ne而受tio̍h过去hiah-ê生活tī淫荡中ê同好者所侮辱,因为hiah-ê人会tùi改变后ê基督徒身上看tio̍h家己ê罪态,会发见原来自己ê丑相,m̄-koh却无法度接受,koh m̄承认,因为án-ne就会有恼羞成怒ê反应出来。

第5节,thang参考希伯来书第四章13节。

非常清楚ê,不管是活teh ê人á是已经死去ê人,lóng仝款会tī上帝ê审判之下。约翰福音ê作者kā咱讲:「天父 lóng 无kā 人审判,他kā 审判ê 权柄lóng 交带Kiáⁿ。(全民版)」(约翰福音五:22,另外参考提摩太后书四:1)然后koh讲即使是已经tī坟墓中ê人,mā kā tùi坟墓内出来接受审判(参考约翰福音五:28—29)。这mā是使徒信经中所讲,koh活了后ê耶稣基督坐tī上帝正pêng,伊kā天顶来审判活人kah死人。

第6节,thang kā chit节对照第三章19到20节。
Chia比较pháiⁿ纺ê问题,就在tī「死人」是teh指甚么对象?有两种讲法:一是teh指hiah-ê tī肉体上确实已经死去ê人。二是teh指hiah-ê灵性上已经死去ê而肉体iáu活teh ê人。一般人lóng是tùi外表判断;当看tio̍h一个人会动,会讲这是一个「活人」,m̄-koh上帝则看人ê心灵。一个会动ê人有可能ná亲像已经死去ê人仝款,俗语所讲ê「心死」大概就是án-ne ê意思。亲像有ê人看起来kah-ná lóng bē振动,每pái有甚么活动,lóng bē参与。就án-ne大家会讲chit-ê人kah-ná不存在仝款,大家lóng kā伊bē记得,ē-sái讲是伊却是活teh ê。基督教ê福音对每一个人lóng存希望,mā lóng寄hō͘极高ê ǹg望,就算是表面上看起来bē动ê人,tī基督教ê福音看起来,lóng存 ǹg望。即使是一个被判死刑ê囚犯,基督教ê福音mā bē放弃,因为伊ê灵魂iáu是需要拯救。换句话讲,真正福音就是对任何性命lóng有「koh活」、「重生」ê ǹg望。

第7节,tùi chit节thang清楚看tio̍h末日ê思想非常chiok厚。Tī彼得前书中chit种思想一再出现,亲像tī第一章13到16节。其实,chit种思想并m̄是只出现tī使徒书信中,tī耶稣基督ê言论mā出现过末日来临教示,亲像马太福音第廿四章,马可福音第十三章,路加福音第廿一章7到36节等等经文,lóng真真明显讲出末日来临ê景象。

新约时代ê教会则进一步kā世界末日来临ê时刻,kah耶稣基督koh再临ê观念连结做伙。使徒ê书信中类似chit种用词一再出现,亲像腓立比书第四章5节,希伯来书第十章25节,雅各书第五章8节,约翰一书第二章8节、28节,启示录第一章3节、第廿二章7节、12节、20节等等。

「警醒祈祷」,chit句话thang讲mā是使徒保罗一再告诫所有信徒ê事(参考以弗所书六:18,歌罗西书四:2,帖撒罗尼迦前书五:17)。祈祷ē-sái讲是基督徒信仰生活siōng bē-tàng欠缺ê一件事,因为祈祷是kah上帝保持美好关系siōng好ê方式,无祈祷,á是bē记得祈祷,lóng等于是bē记得有上帝tī咱性命中仝款ê严重。

第8节,chit节thang讲是教会存在siōng大ê特色,因为一间教会若是会失去「彼此真诚相疼」ê见证,就无法度传出上帝tī耶稣基督内面拯救kah爱ê信息。耶稣基督tī约翰福音第十三章34到35节bat讲过,只有tī疼ê内面,ē-tàng hō͘人看出咱是他ê学生。

作者tī chia讲beh「真诚相疼」ê「真诚」chit-ê字,tī希腊文是用「ektenes」,意思是teh指「无停」,mā就是讲相疼ê心bē-tàng停止,是继续不断ê teh进行。因为án-ne只要教会存在ê一工,信徒就beh继续不断来练习「真诚相疼」ê这门功课。

Koh讲,chit节讲「因为爱ē-tàng消除真chē罪过」,chit句话是引用箴言第十章12节所讲ê:「憎恨引起争端;爱ē-tàng掩盖一切过错。」箴言chia所讲ê「掩盖」,意思是teh指赦免ê意思(参考雅各书五:20)。

第9节,「彼此殷勤接待,m̄-thang埋怨」,chit句话是有一个重要ê背景,he就是早期教会无亲像今á日有神学院teh训练传道者到各地去传福音、布道等工作。却是有真chē tī信仰上有感动者四界去见证福音,像siōng早tī耶路撒冷教会选出来ê七位使徒ê协助者仝款。另外就是有使徒保罗ê门徒,亲像提多、提摩太等类似chit种传福音者,in tī早期教会中,并m̄是固定tī一间教会,却是一个人同时负责真chē间教会,需要四界去传福音ê信息,因为án-ne,每pái到一间教会去,就需要有人接待。

另外一方面,早期教会因为信徒少,彼此之间ê往来mā会koh khah亲密些,因为彼此lóng是信徒,所以lóng会透过教会之间ê联系提供接待ê机会,án-ne有几个好处,其一是节省了真chē不必要ê费用,其二是thang透过án-ne ê接待,大家彼此分享教会ê实况。

第10到11节,作者提供一个重要ê认bat:tī教会chit-ê信仰团契中至少有两个基本要件,其一是每人身上所有ê恩赐lóng是tùi上帝来ê赏赐,这是为tio̍h beh彼此分享(服事),却m̄是beh独自拥有。其二是用上帝赏赐ê chiah-ê恩赐来服事福音ê工作,并m̄是beh展宝家己ê能力,却是为tio̍h beh荣耀上帝ê名。Chit点mā是长老教会创会者约翰・加尔文所讲ê「kā一切荣耀归hō͘上帝」。

「宣讲上帝ê话」。圣经就是上帝ê话,这是非常清楚ê,若是传道者无照圣经ê教示来传扬,he就是m̄-tio̍h。教会存在ê主要使命就是beh传扬上帝ê话,而传道者koh khah是beh尽心、尽力地kā上帝ê话传扬出去。
「世世无穷,阿们」chit句话,看起来ná亲像一封phoe ê结尾仝款。Tùi腓立比书第四章20节,希伯来书第十三章21节,以及彼得前书第五章11节等等,lóng会看tio̍h这是用做结束句型。因为án-ne,有kóa圣经学者认为彼得前书ê第一封phoe,应该是到chit-ê地方暂有一个段落,然后tùi第四章12节开始,又koh是另外一封新ê书信。

第12到14节,作者写chit本书信ê主轴,就是teh鼓励因为信仰而受苦ê众信徒,ài大家有坚定ê信心,m̄-thang失志、馁志,上帝必定会有重大ê报偿teh等待。

马太福音第五章记载耶稣基督tī山顶教导门徒ê时mā讲过chit种教导, ài众门徒明白为tio̍h传福音而受苦难,等于tī天顶累积了真chē福气仝款,he是上帝tùi天顶beh奖赏hō͘为福音受迫害者所准备ê。这真清楚hō͘咱看tio̍h有坚定信心ê重要性,因为有坚定ê信心,chiah bē tī受tio̍h迫害ê时就改变了本来ê信仰。使徒保罗就特别提醒当时ê信徒,ài有受迫害ê心理准备,伊讲:「所有ài beh kah 基督耶稣结联来过敬虔生活ê 人,lóng 会受迫害。(全民版)」(提摩太后书三:12)伊mā讲若是因为信仰ê缘故而受tio̍h迫害,he就是等于teh「分担基督ê苦难」仝款,mā tio̍h「分享」耶稣基督ê koh活ê「荣耀」,伊强调讲chit份荣耀乃是上帝特别保留落来beh hō͘所有因为信仰而受tio̍h迫害ê人领受ê(参考罗马书八:17)。

作者讲「若因跟tòe基督而受凌辱,就实在有福气;这表示荣耀ê圣神,就是上帝ê灵,tī lín身上」,chit句话非常重要,真可能引用自siōng早殉教ê司提反之经历,当伊被迫害而一定tio̍h面对民众the̍h石头beh phah死伊ê时chūn,使徒行传作者路加án-ne描讲述:「独独司提反 hō͘ 圣神充满,gia̍ h 头看天,看tio̍h 上帝ê 荣光,mā 看tio̍h 耶稣khiātī 上帝ê 正pêng。(全民版)(使徒行传七:55)这是「荣耀ê圣神」充满司提反ê心,chiah hō͘伊心甘情愿地接受性命ê苦难而不退却。彼得前书作者强调基督徒受tio̍h迫害就是án-ne,信仰tú-tio̍h苦难并m̄是pháiⁿ运,颠倒tio̍h知影he乃是上帝所允准ê,因为这是teh帮助一个信徒透过受苦而hō͘信仰ê内涵ē-tàng升华。因为án-ne,作者tī第12节就讲这就ná亲像「tú-tio̍h火仝款ê考验」

第15节,作者tī chit节特别提起是因为信仰ê苦难,并无包括chiah-ê属tī伦理道德,á是人为ê疏忽。Mā就是讲,m̄-thang kā家己ê错误,全部lóng推到信仰ê层面,这并无正确。

第16节thang参考使徒行传第十一章26节,该处经文提起「基督徒」chit-ê名号ê由来,就是tùi安提阿开始ê。Á安提阿chia ê基督徒就是因为tī耶路撒冷tú-tio̍h迫害逃避到chit-ê所在,m̄-koh in并m̄是因逃避而kā福音ê信息hō͘关闭、改变,颠倒,in逃到安提阿去避难(参考使徒行传十一:19),然后kā安提阿当做广传福音ê基地,mā因为án-ne hō͘ in因信耶稣基督而得tio̍h「基督徒」chit-ê名称。因为án-ne,这「基督徒」并m̄是hō͘信徒感觉见笑ê「名号」,颠倒,这是一个「荣耀上帝」ê称呼。

第17节,「审判ê时chūn到à」,而审判beh tùi「上帝家ê kiáⁿ」开始先受审判,chit种观念真可能kah以西结书第九章6节ê经文背景有关。该处经文提起上帝ê审判先tùi耶路撒冷ê长老开始,然后chiah是老人到婴á等。先知阿摩司mā真清楚讲,以色列人民是上帝特别拣选出来ê族群,因为án-ne,tī审判ê时chūn,上帝会特别注意tio̍h in(参考阿摩司书三:2)。
作者tī chia强调一个重点:如果一个耶稣基督ê信徒beh ài得救,lóng需要付出真大ê代价,hiah-ni̍h无信ê人想beh得救,岂m̄是需要付出koh khah chē?Thang想像会有koh khah chē ê困难。

第19节,作者勉励所有ê信徒,tio̍h用「完全信赖」ê心,kā性命委托tī慈悲ê创造主、上帝ê手中。Chia作者提起两件事,第一是甚么款ê人ē-tàng kā家己ê性命完全交托tī上帝手中?就是hiah-ê因为上帝ê旨意而受苦难ê人。换句话讲,是hiah-ê确实是为tio̍h信靠上帝福音、传扬福音而受苦ê人,chit种人thang kā性命交托tī上帝手中。第二是chia所讲tio̍h ê「信赖」chit-ê词(tī《和合本》用「交与」,tī《台语汉字本》版用「交带」),chit-ê词tī希腊文是「paratithesthai」,这字ê意思就是kā钱财委托放siōng thang信靠ê亲友保管。Á受委托保管ê人会感觉真荣幸,因为被信任。Á交托保管ê人,thang绝对放心。

一个对上帝tī耶稣基督内面ê救恩有绝对信心ê人,就是上帝所欢喜ê对象,chit种人,因为对上帝有绝对信心,mā宁可kā家己ê性命交托tī上帝手中,这是真正确ê事,因为上帝就是性命ê创造主,mā是赏赐性命ê主。
重新查询 专卷研经 彼得前书系列
错误回报,请联系comm[@]fhl.net