Tùi彼得前书ê内容、讨论ê问题等，就thang看出lóng是kah初代教会遇tio̍h ê背景有真密切ê关系。第一世纪ê初代教会是tú-tio̍h极大苦难，亲像：tī主后65年左右罗马皇帝尼禄火烧罗马城，然后嫁祸hō͘基督徒ê事件，然后伊用非常残酷ê手段，狠(hiông)狠迫害基督徒。Á使徒彼得就是tī hit段迫害ê时期被钉死tī十字架上ê。Tùi chia就知影统治者beh迫害基督徒chìn前，lóng会开始出现一kóa小动作，这就是此本书信出现ê一个背景。这ná亲像《现代中文译本》tī chit本书信chìn前简介中所讲ê：

「本册ê主要目的teh鼓励hiah-ê为tio̍h信仰tú-tio̍h苦难kah迫害ê信徒。作者一再以耶稣基督ê福音—伊ê死、koh活，kah koh来ê应允—劝勉in，hō͘ in希望。因为án-ne，in一定tio̍h忍受苦难，确信苦难是对in信心ê考验，并且ē-sái hō͘ in tī『耶稣基督显现ê日子』得tio̍h奖赏。」
Tùi chit段简介ê话中，thang看tio̍h早期教会确实面临了罗马帝国非常大ê残酷迫害手段，致使真chē信徒teh期待末日赶紧来临，上帝ê审判ē-tàng快快来到。

Chit章经文mā是离bē开chit种内容，劝勉信徒受苦是暂时ê，m̄-koh透过受苦，却thang清楚知影信徒ê坚忍程度是m̄是够额承受chiah-ê苦难。Koh讲，tī苦难中间，iáu是beh坚持维护信仰生活ê圣洁。Chit对每一个信徒来讲，mā是一门真重要ê功课。

    Ná亲像其他书信仝款，罗马时代ê书信起头lóng会有请安语。续落来，作者就讲tio̍h tī信仰内面tú-tio̍h苦难，会带来性命ê ǹg望。因为án-ne，伊期待所有ê信徒一定会坚持落去，m̄-thang改变á是放弃。

    第1到2节，这是罗马治理时代书信写法ê方式，信ê开始就是先自我绍介，koh来是提起信徒，续落来是请安kah祝福。

Chia讲写此书信ê人使徒彼得，并且伊讲家己是「耶稣基督ê使徒」。Chia ê「使徒」ê意思是teh指耶稣基督所拣选拣选ê十二位门徒。当犹大出出卖耶稣基督而且自刣死亡了后，早期教会bat讨论过beh补选一位续接犹大ê使徒位置，为tio̍h án-ne使徒彼得建议一定tio̍h tùi行洗礼约翰开始直到耶稣基督死去koh活而且升天ê时，lóng kah in同在同齐ê人才有资格被推选（参考使徒行传一：21—22）。大家就tùi众人中间推选出两个人，koh再以抽签ê方式抽出马提亚来递补犹大ê「使徒」位置。Tùi chia就thang看出「使徒」chit位号mā teh表示特殊ê身分。

作者讲伊写chit封书信ê对象，是「hō͘上帝选召ê子民」，chit句话已经清楚指出就是针对基督徒讲ê。Á chiah-ê信徒是「因逃难散居tī本都、加拉太、加帕多家、亚细亚、庇推尼」等五个地区。Tùi chit句话thang看tio̍h作者写chit本书信ê时，迫害ê问题已经非常严重了，而chiah-ê地区tī当时lóng是属tī罗马行省。

Koh讲，作者特别强调chiah-ê信徒lóng是「按照上帝预定ê旨意，是藉tio̍h圣神而成做圣洁ê」子民。这lóng teh表示ē-tàng成做上帝ê子民，是照上帝ê旨意kah计画而拣选，ná亲像旧约时代拣选以色列民族仝款，m̄是根据人ê条件，却是上帝照家己拯救ê计画来进行拣选工作。因为án-ne，拣选出来就是「成做圣洁」ê，表示分别为圣ê意思。Án-ne，所有被拣选ê子民（信徒）一定tio̍h「顺服耶稣基督」，chia所讲ê「顺服」，意思就是注意听，意思是teh指听从耶稣基督ê话kah教示ê意思。

第3到5节，chit三节经文mā讲tio̍h基督教信仰上非常重要ê认bat：
一是上帝乃是慈爱ê上帝，而且他ê慈爱是「无限ê」。

二是上帝伟大ê疼就是tùi耶稣基督自「死里koh活」ê神迹显明出来。
作者tī chia强调因为耶稣基督ê koh活，带hō͘所有信伊ê人有「新ê性命」，chit种新ê性命带来ê就是有「活ê ǹg望」。

Chia mā提起上帝拣选ê子民必定会得tio̍h美好ê奖赏，就是「不败坏、不污损、无衰退残」ê福泽。注意作者特别强调是「天顶ê福泽」，表示kah世间ê无仝；在世间ê赏赐，是会败坏ê，而tī天顶ê则bē败坏ê，是永恒ê。这ná亲像耶稣基督teh劝勉大家ài kā「财宝积存在天顶」，因为tī天顶就bē被盗贼偷the̍h，mā bē被虫蛀pháiⁿ（参考路加福音十二：33）。M̄-koh chiah-ê奖赏并m̄是平白得tio̍h，却是需要努力到「终点」ê人ē-tàng享受。

第6到7节，chit段经文tú好说明第5节所提起，天顶ê奖赏是为hiah-ê有经过努力ê人准备ê。Chia真清楚讲出一个耶稣基督ê信徒，必定会面对真chē信仰上ê「试炼」á是「受苦」，作者鼓励信徒讲即使án-ne，mā tio̍h「喜乐」，表示用甘愿ê心去承受。Chia提起「种种ê试炼」，表示迫害ê样式有真chē种，照当时罗马治理之下，包括有ê被送去竞技场去拼死活，有ê被丢入野兽群中去相ián生死，有ê被送到奴隶市场去贩卖，有ê被强暴，有ê做奴工到死去等等。M̄-koh有苦难临身ê时，人chiah会清楚知影家己到底有jōa-chē信心thang挡会tiâu考验。作者强调信心ná亲像teh炼金，jú经历苦难，好ê信心就会用明亮，有信心ê人tī耶稣基督显现ê日子来临ê时会「得tio̍h o-ló、光荣，kah尊贵」。

作者tī chia已经提起一个非常重要ê信息：就是耶稣基督ê koh再临，这mā是早期教会非常重要ê信仰告白。Mā是彼得前书重要ê信息之一。其实chit三项指ê lóng仝款ê内容，因为被耶稣基督o-ló就是一项极大ê荣耀，chit种信徒mā是上帝国度里有份ê人，chit种人ê性命tī上帝眼中就是非常尊贵。

Koh讲，chia所提起tī末日耶稣基督koh再临时刻显现ê时，有坚定信心而且经过考验了后证明属实ê，会得tio̍h「o-ló、荣耀、尊贵」。

第8到9节，当做者写chit封书信ê时，耶稣基督iáu未koh再临，因为án-ne，大家看bē-tio̍h耶稣基督，而且有真chē信徒lóng是后来tī众使徒传福音ê时，chiah得tio̍h福音ê信息而信耶稣基督ê。因为án-ne，in并「无见过」耶稣基督。虽然án-ne，作者对信徒ê表现非常肯定，因为in是「爱」kah「信」耶稣基督，并无受tio̍h任何影响。这ná亲像希伯来书作者所讲ê：「信是所ǹg 望ê tāi-chì ê 凭据，是所未看tio̍h ê tāi-chì ê 确据。(全民版)」（希伯来书十一：1）。彼得前书ê作者tī chia认为只有tī chit种绝对不疑ê信心基础上，chiah会带hō͘人「灵魂ê得救」ê结果。注意chia所讲ê「灵魂ê得救」，意思是teh指性命ê得救。

第10节，作者讲上帝tī耶稣基督内面拯救ê恩典，tī旧约先知时代就已经有ê预言。其实，thang án-ne了解：新约ê作者有一个努力目标，就是beh kā旧约时代先知所预言teh beh来临ê拯救者kah耶稣基督连结做伙。这mā是马太福音作者siōng努力ê工作之一，因为该福音书是写hō͘犹太人看ê。彼得前书ê作者mā是朝chit-ê方向努力，为beh hō͘早期教会ê信徒明白，耶稣基督就是旧约先知所预言hit位beh来临ê拯救者。

第11节，chia提起众先知是经过「探索」了后，发见上帝拯救ê恩典是「基督一定tio̍h受苦难」来表明上帝ê疼。Beh了解chit句话就需要回顾到kui本旧约圣经ê历史背景。主前721年北国以色列被亚述帝国灭亡了后，以色列人被俘虏贩卖到外国做奴隶，tùi hit时开始，哀哭、呼求上帝拯救ê声音就从来m̄-bat间断，mā tùi hit时chūn开始，上帝透过先知ê话传出拯救ê信息。直到南国犹大tī主前586年被巴比伦消灭，这呼求ê声音频率jú来jú chē，而先知ê预言mā相对ê jú来jú明显，特别是tī先知以赛亚ê预言中，就真清楚描述出hit位beh来ê拯救者（基督）kā以受难者ê形像出现，这mā就是用赛亚书第五十二章13节到五十三章12节ê背景。
chit-má彼得前书ê作者讲耶稣基督就是chit位先知以赛亚所预言ê拯救者，伊tī十字架上ê受难，就是一个明显ê记号，伊ê死，就是为tio̍h所有信靠伊ê人而献上性命ê。

第12节，上帝藉tio̍h耶稣基督拯救ê信息是透过「圣神ê能力」传达出来，chit点tùi使徒行传第二章描述tī五旬节ê时，圣神充满tī众使徒身上，hō͘ in勇敢见证福音，就因为án-ne，福音开始广传出来。Chit-ê福音ê好消息是「连天使」mā想beh「明白」chit-ê大好消息。换句话讲，ē-tàng听tio̍h chit-ê消息，是非常珍贵难得ê。