列王纪上 8章22节 到 8章53节   背景资料  上一笔  下一笔
这是所罗门ê一篇祈祷文,主要是teh祈求上帝祝福以色列人民。Tī chit段祈祷文中,伊主要提出七点:祈求上帝继续带领以色列人民(第25到30节);祈求上帝作in ê审判者,hō͘ pháiⁿ人无法度逍遥法外,好人得tio̍h他ê垂怜(第31到32节);恳求上帝赦免忏悔ê以色列人民,hō͘ in tùi敌人手中ē-tàng tńg来(第33到34节);祈求上帝眷顾以色列人民khiā起ê土地有甘霖(第35到36节);hō͘以色列人民tī chit块土地顶面会得thang安居,免除灾祸(第37到40节);mā为外族人祈求上帝ê赐福(第41到43节);祈求上帝帮助以色列人民tī战争中得胜(第44到45节);为得罪上帝,á是被俘虏ê以色列人民祈祷(第46到51节)等。

第22到24节,这是歌颂上帝确实信守kah以色列人民所立ê约。伊讲上帝所应允ê每一件事,lóng有实现。

第25到26节,所罗门祈求上帝,他bat应允老父大卫,讲伊后代kiáⁿ孙若lóng会顺从上帝ê命令,in就永远作以色列ê王,希望chit项应允lóng会实现。

第27到30节,虽然圣殿并m̄是ē-tàng hō͘上帝khiā起得下,m̄-koh祈求上帝ē-tàng垂听伊kah以色列人民tī-chia圣殿ê祈祷。祈求上帝日夜看顾这间圣殿,hō͘伊成做名符其实ê祈祷殿宇。

第31到32节,祈求上帝成做以色列人民ê审判者,hō͘作恶ê人会受tio̍h应该得tio̍h ê惩罚,hō͘被冤枉ê人会得thang得tio̍h伸冤。

第33到34节,如果以色列人民得罪上帝而被敌人phah败,被俘虏伊去。若是in悔改认罪,祈求上帝赦免、怜悯,并且chhōa in tńg来chit块上帝所赏赐ê土地。

第35到36节,若是以色列人民因为得罪上帝,致使发生干旱ê时,若是in知影悔改认罪,恳求上帝赦免in ê罪,并且教导in行正确ê道路,koh一pái落雨tī in所khiā起ê chit块土地顶面。

第37到40节,如果有发生大灾难,á是饥荒、瘟疫等等,甚至被敌人包围,chit时,若有人tùi心内发出真实哀求ê声音,恳求上帝会垂怜,照in各人应得ê赏赐hō͘ in,án-ne,以色列人民就会知影敬畏上帝。

第41到43节,如果有外族人听tio̍h上帝奇妙ê作为,而愿意向上帝祈求ê时,恳求上帝mā会垂听这外族人ê声音,án-ne,全世界ê人就lóng认bat真神上帝,知影敬畏上帝,并且知影这圣殿就是敬拜上帝ê所在。

第44到45节,若是因为上帝旨意而出征,恳求上帝会保守in,hō͘ in tī战场上ē-tàng得胜。

第46到到51节,若是以色列人民得罪上帝,而被phah败并俘虏到异乡去,若是in知影悔改认罪,恳求上帝ē-tàng因为in真心悔改而赦免in,垂听in ê祈祷,hō͘俘虏in ê人生出慈悲ê心好款待in。

以上chiah-ê祈祷,lóng有一个共同中心点:以色列人民无论tī tó位,只要in是向圣殿祈祷,期待上帝会垂听,并且伸出救助ê手。换句话讲,chit座圣殿就是上帝khiā起ê所在,而且上帝kah以色列人民立约ê记号,是一座实实在在用来祈祷ê殿宇。

后来,先知以赛亚tī以色列人民tùi巴比伦被tháu放回乡了后,伊就一再强调重建起来ê圣殿,应该是「称做万民祈祷ê殿」(参考以赛亚书五十六:7)。M̄-koh tī耶稣ê时代,圣殿反tńg因为hiah-ê虚假ê宗教领袖,变成耶稣所谴责ê「贼窝」、「市场」了(参考马太福音廿一:13,马可福音十一:17,路加福音十九:46,约翰福音二:16)。

    第52到53节,所罗门向上帝祈求永远看顾以色列人民,因为in是上帝tùi万民中拣选出来ê子民。

重新查询 专卷研经 列王纪上系列
错误回报,请联系comm[@]fhl.net