列王纪上 4章1节 到 4章19节   背景资料  上一笔  下一笔
Chit章mā是另外一种方式teh说明所罗门kā上帝赏赐hō͘伊ê智慧,运用tī伊治国ê行政事务上,作者用伊án怎任派工作内阁人员,以及分配辖区hō͘地方首长来说明伊确实是一个有智慧ê君王。

    Chit段经文thang分做两部分来看,一是第2到6节,chit部分是宫廷,mā就是所讲ê内阁大臣名单,二是第7到19节ê地区首长,mā就是chia所讲ê总督。

    第1节,「所罗门是全以色列ê王」,chit句话已经清楚说明经过宫廷斗争了后,所罗门确定已经稳tiâu政权,以色列人民mā确认伊就是in ê王,而且是一个有上帝赏赐ê智慧ê王,thang hō͘伊安心治理国家大政。

第2节,伊任命所有臣仆,就是tùi大祭司开始,表示伊tī宫廷中占有siōng重要ê角色。

「大祭司:撒督ê kiáⁿ亚撒利雅」,tùi chit句话就thang明白后来ê祭司,就是「撒督」后裔,新约福音书所记载ê「撒督该派」mā是伊ê后裔。

	第3到6节,chit段经文ê名单包括:「书记」,这kah今á日ê「幕僚长」á是「秘书长」真接近。「史官」,是teh指类似国家ê总书记,官职真koân,拥有实权。「统帅」,有ná现代ê国防部长,á是参谋总长。「祭司」,是teh指掌管宗教事务,kah大祭司位阶差真chē。「总督长」,就是掌管tùi第7节开始ê每一个区域有「总督」,chia ê总督长就是负责管理这十二个总督(第19节c句)。

    「王室顾问」,这是所罗门siōng重要ê幕僚长,类似现今ê行政院长。

    「宫仆监督」,有ná现今ê内政部长。

    「奴工监督」,这表示所罗门时代已经有「奴工」,指买来ê奴隶,á是俘虏ê奴隶。这mā表示伊bē记得祖先时代,in bat tī埃及当过奴隶。后来,sàn-chhiah ê人民卖身为奴工,这mā为伊死后,kiáⁿ罗波安teh处理北部支派贫困生活问题ê时,因为无办法体会奴工生活ê困境,结果hō͘劳工部长活活被phah死(参考十二:18)。

	第7到19节,chit段经文是十二个行政区kah总督ê名单。In主要职责是「一定tio̍h tùi所管辖ê地区供应食物hō͘王kah王ê家族;各区总督每年负责一个月」。Chit种工作就是等于今á日所讲ê负责税务稽徵ê工作。Ài beh特别注意ê是,这十二个地区并m̄是根据约书亚分配给十二支族ê方式,因为十二支族ê地区各有无仝,生产力mā就有差别。如果根据约书亚ê方式,根据大细、生产力缴纳税额,án-ne就bē有siuⁿ大问题。Taⁿ是无论大细地区,每一个行政区lóng tio̍h负责一个月ê王室费用,对比较sàn-chhiah ê地区来讲,就形成极大ê负担,chit点可能就是引起后来所罗门死后,北部族群推举耶罗波安,由伊代表去向所罗门ê kiáⁿ罗波安请求,减轻in ê税赋ê背景(参考十二:4)。结果是要求减轻税赋to̍h bē-sái得,最后变成王国分裂,实在可惜。

重新查询 专卷研经 列王纪上系列
错误回报,请联系comm[@]fhl.net