Chit章ē-sái讲是一幕一幕血淋淋ê宫廷斗争记录，记载所罗门继任王位后，照老父大卫所交带，开始铲除异己，甚至，kā兄哥亚多尼雅杀害。

第二章1到12节：Chit段经文ē-sái讲是大卫ê临别遗言kah往生，m̄-koh这遗言m̄是赦免hiah-ê得罪伊ê人，而是beh继任伊王位ê kiáⁿ所罗门去进行报复、铲除ê杀害动作。M̄-koh这并无表示伊ê双手比较洁净。

第1到4节，Tī chit段勉励所罗门ê话，真清楚申命记作者ê教导，一定tio̍h严格遵守摩西律法册上所有ê规定，án-ne chiah ē-tàng得tio̍h上帝ê赐福（参考申命记第八章）。

第5到6节，特别ài所罗门一定会注意约押，讲伊「刣死无辜ê人」，á这责任却hō͘大卫承担。伊ài所罗门mài hō͘约押「善终」。其实，约押ē-sái讲是大卫siōng忠心ê武官，一路上lóng是伊扶持大卫ê，m̄-koh taⁿ大卫却ài kiáⁿ所罗门bē-tàng hō͘约押善终，理由是伊杀害无辜ê，m̄-koh大卫家己为tio̍h谋害无辜ê乌利亚，却假借约押ê手杀害ê。

第7节，这是为tio̍h beh遵守伊答应好款待基列人巴西莱ê kiáⁿ ê诺言，chit节经文thang参考撒母耳记下第十七章27到29节。

第8到9节，是beh所罗门处理基拉ê kiáⁿ示每，chit件事ê背景thang参考撒母耳记下第十六章5到14节、18节b句到23节等等，显然地，大卫并无照所讲ê话，遵守不杀害示每，伊虽无杀害伊，却ài所罗门「一定会想法子」去kā示每处死。Tùi chit点mā thang看出大卫是一位真会「记恨」ê人。

第10到12节，叙述大卫往生，执政四十年，伊kā以色列国交hō͘ kiáⁿ所罗门ê时，hit时以色列「国势非常稳固」。