列王纪上 18章1节 到 18章19节   背景资料  上一笔  下一笔
Chit章ē-sái讲是旧约圣经中siōng精彩ê一章记事,说明上帝ê先知,á是人以家己ê能力所雇用ê先知,这二者之间siōng大ê差别。其实,chit件有关先知以利亚kah亚哈御用ê先知、祭司之间ê事件,lóng tī说明一件事:人想beh脱离上帝,家己认为kah上帝仝款有能力。结果是有chit种想法ê人ê罪,kan-taⁿ会koh khah严重,hō͘上帝koh khah愤怒,对众人一点帮助mā无,kan-taⁿ会连带受拖累而已。

Chit段经文描述先知以利亚遇tio̍h亚哈ê事务官俄巴底ê经过。俄巴底是一个敬畏上帝ê人,因为án-ne,bat救助了一百个先知免遇tio̍h亚哈ê bó͘耶洗碧杀害。当俄巴底受亚哈差派去chhōe水源ê时,tú-tio̍h先知以利亚,伊ài俄巴底tńg去kā国王亚哈讲tú-tio̍h伊,而且hō͘伊知影地方。俄巴底会惊惶ê原因,是伊知影上帝teh庇护先知以利亚,万一伊tńg去通报国王亚哈,结果亚哈来chhōe而无tú-tio̍h,必定会刣死伊。M̄-koh先知以利亚hō͘ in保证绝对bē án-ne。这mā说明俄巴底确实知影先知以利亚身上有上帝ê灵同在。

第1到2节,chit节开始讲上帝决定beh落雨了,因为已经饥荒到à「第三年」,迦南地区必定死亡惨重。

第3到4节,亚哈ê嚣张,必定kah伊ê bó͘耶洗碧有密切关系,因为伊敢杀害上帝ê先知,表示根本就m̄惊上帝。Chit种人往往会扮演上帝ê角色。Á俄巴底却tī siōng危险ê时刻,敢tī暗中救助一百个先知免遭耶洗碧杀害,tú好表示伊确实是一个忠实tī上帝ê以色列子民。

    第5到6节,tùi chit两节thang看出干旱带来ê饥荒之严重性,已经到à一定tio̍h刣家畜动物chiah ē-tàng充饥。亚哈kah俄巴底分别到全国各地去chhōe青草,只为tio̍h beh hō͘家畜动物活落去。Chia特别提起「马kah骡子」,chit两种动物tī当时m̄-nā是主要交通工具,马koh-khah是军队主要ê战力之一部分。表示情况已经严重到连国防安全lóng受到à影响。

第7到8节,就tī路上,俄巴底tú-tio̍h先知以利亚,因为án-ne,先知以利亚ài俄巴底tńg去kā亚哈讲伊遇tio̍h了先知以利亚,并告亚哈地点,意思是beh hō͘国王亚哈来chhōe伊。

第9到14节,chit段经文ē-tàng看出亚哈bat tī各地chhōe先知以利亚。原因是伊bat当面kah亚哈讲除非伊祈祷,若无,上帝bē落雨。亚哈mā惊惶有他国ê人藏匿先知以利亚,hō͘伊无koh祈祷落雨,án-ne落去,会hō͘北国以色列不战而亡。M̄-koh俄巴底真清楚,并m̄是别国á是某一个人隐藏先知以利亚,chiah hō͘亚哈chhōe bē-tio̍h,却是上帝亲自出手。因为án-ne,如果伊tńg去报告国王亚哈,讲伊tú-tio̍h先知以利亚,并讲出地点。万一,上帝改变主意,kā先知以利亚带到其他地方,国王亚哈来à而chhōe bē-tio̍h,必定会hō͘国王掠做是伊欺骗,会kā伊杀害。因为án-ne,伊向先知以利亚表示,伊m̄敢回报。伊特别向先知以利亚提出家己bat保护先知,m̄-koh无希望保护先知ê结果,却被先知以利亚害死。

第15到17节,先知以利亚回应俄巴底,hō͘伊知影chit pái一定会见tio̍h国王亚哈。意思表示伊thang放心,chit pái bē藏匿起来。果然,chit pái亚哈看tio̍h先知以利亚,而且当面就责骂伊是「hō͘以色列受拖累ê人」。伊bē记得是因为伊听从bó͘耶洗碧ê话,iáu带领人民弃sak上帝,去拜巴力偶像,chiah会惹上帝愤怒。

第18到19节,先知以利亚真清楚指出,真正带来灾祸ê,就是国王亚哈家己。伊甚至ài亚哈kā伊供养ê「四百五十个巴力ê先知kah四百个亚舍拉女神ê先知同齐」带到迦密山顶去,先知以利亚beh tī hia kah in见面。

重新查询 专卷研经 列王纪上系列
错误回报,请联系comm[@]fhl.net