列王纪上 16章21节 到 16章34节   背景资料  上一笔  下一笔
Tùi第21节开始,一直到第廿二章40节止,lóng是记载有关北国以色列一个新ê王朝—暗利王朝时代ê事迹。

第21到22节,虽然tī前线ê军队拥护暗利为王,m̄-koh并m̄是所有ê人lóng拥护伊,有另外一半ê人是拥护基纳ê kiáⁿ提比尼为王,这mā thang看出争夺王权ê烧热烈,mā讲出北国以色列政局ê动荡bē稳。不过,后来因为提比尼往生,暗利就真紧成做北国以色列ê王。列王记作者并无说明提比尼往生ê原因。

第23到24节,chit两节非常重要,说明北国以色列原本首府是tī得撒,tī暗利执政时代,伊tī主前大约880年ê时,用「六千块银á tùi一个名撒马ê人hia买来撒马利亚山」,伊tī chit座山建造一座城,就kā它称做「撒马利亚城」,chia就成做后来北国以色列ê首府。后来,tī主前721年,亚述帝国消灭北国以色列后,kā人民俘虏去做奴隶,并移入外族人到撒马利亚,强迫通婚,生落来ê后代,就被以「撒马利亚人」之轻视语气称呼。

第25到28节,列王记作者用「做上主看做邪恶ê事」chit句话来形容败坏ê君王,mā是带领人民弃sak上帝ê君王。暗利统治北国以色列共计十二年,死后,伊ê kiáⁿ亚哈继任为王。

第29节,tùi chit节开始,到列王记上卷第廿二章止,lóng是记载有关以色列王亚哈ê事迹。Chit节讲亚哈当北国以色列ê王共计长到「二十二年」。

第30到33节,chia详细讲述有关亚哈王犯罪ê事,用一句简单ê话来形容亚哈王,就是伊「做上主看做邪恶ê事,比伊chìn前任何一个王koh khah甚」,chit句话就ē-tàng清楚伊到底做kóa甚么事loh。伊m̄-nā娶外邦cha-bó͘-gín-á做bó͘,而且建造偶像神明,亲自chhōa人民去拜chiah-ê偶像神明,包括巴力、亚舍拉等。

第34节,chit节讲亚哈在位期间,命令伯特利人希伊勒重建重修耶利哥城,主要是在tī防御工事。M̄-koh约书亚当年攻打耶利哥城后,就bat下过诅咒,不准有任何以色列人重建hit-ê城,约书亚ê诅咒讲:「见若起来起造chit-ê 耶利哥城ê,tio̍h tī 上主ê 面前受咒诅。伊hē 地基ê 时,会死大kiáⁿ;hē 门ê 时,会死soah 尾kiáⁿ。」(全民版)」(约书亚记六:26)taⁿ这诅咒ê话语应验tī希伊勒ê身上,伊ê大kiáⁿ亚比兰,kah小kiáⁿ西割接踵来死,chit种咒语本身beh表明ê,就是无后代thang传承家族命脉,因为án-ne,用「大kiáⁿ」kah「细kiáⁿ」来表示。Á这mā清楚表示亚哈已经bē记得约书亚警告ê话语,同时表明伊ê心中根本to̍h无上帝。

重新查询 专卷研经 列王纪上系列
错误回报,请联系comm[@]fhl.net