列王纪上 13章11节 到 13章34节   背景资料  上一笔  下一笔
Chit段经文讲述chit位神ê人ê另外一面。Tī头前,伊面对国王耶罗波安ê邀请,勇敢地拒绝,而且当面指责mā m̄惊。M̄-koh tī chia,有假先知冒用上帝ê话邀请伊,伊却信认为真,无真实地遵守上帝ê话而接受邀请lim食,结果是死tī非命。Chit段故事真明显teh说明一件事:上帝ê命令,绝对服从。无论是甚么人,á是假藉上帝ê名(第18节),lóng无法度bē记得上帝亲身ê启示。特别是对tī上帝ê奴仆,tī一个弃sak上帝诫命ê世代中,koh khah应该tio̍h随时注意有人会利用宗教信仰ê名义,胡乱发出信息,chit点koh khah须明白谨记在心。上帝ê奴仆一定tio̍h忠实tī上帝,这是非常重要ê一点,无法度妥协。

第11到15节,chit位神ê人tī伯特利对耶罗波安所讲ê话kah医ê事,传开à。Hō͘一位老先知ê kiáⁿ知影,tńg去kā老先知讲。老先知知影神ê人tńg去ê路径,马上骑驴á赶去chhōe chit位神ê人,并且请伊跟tòe老先知tńg去厝里用餐。

第16到18节,原本神ê人拒绝,m̄-koh chit位老先知讲家己mā是先知,得tio̍h上帝ê天使启示,ài神ê人跟tòe伊tńg去厝里同齐lim食。作者真清楚说明chit位「老先知是teh讲白贼」。伊m̄-nā无听神ê人ê话,反tńg是用讲白贼teh试探chit位神ê人。Mā thang án-ne讲,即使是先知,若是无上帝传达hō͘伊信息,伊mā无法度假冒上帝ê名讲话,chit点tī先知耶利米时代就是一个真清楚ê例。有bē少人就是冒用上帝ê名传话,结果害犹大灭亡。

第19到22节,上帝ê声音传到chit位神ê人,kā伊谴责竟然违背上帝ê话语。因为án-ne,伊会「被刣」,而且尸体无法度葬tī厝族ê坟墓内。当chit位神ê人听tio̍h上帝chit种信息了后,伊无赶紧悔改认罪,祈求上帝ê怜悯赦免,ná亲像耶罗波安请求伊代祷,恳求上帝怜悯后,半遂ê手随时恢复。M̄-koh chit位神ê人并无án-ne做。这mā说明神ê人mā会有bē记得上帝ê命令ê时chūn。

第23到25节,chit只狮mā是奉差遣来咬死chit位无遵守上帝命令ê神ê人,狮并m̄是因为iau饿而攻击神ê人,却是执行上帝ê命令,惩罚神ê人。因为án-ne,当狮咬死神ê人ê后,并无食神ê人,m̄-nā án-ne,狮iáu khiā tī尸体边á,有护守tio̍h ê意思,hō͘神ê人ê尸体容易被看出来。

第26到28节,chit位试探神ê人老先知得tio̍h chit-ê消息,清楚知影神ê人并无完全遵守上帝ê命令chiah会有chit种结果。就án-ne伊就赶紧出门去看,果然发见驴á无被咬伤,神ê人ê尸体完好。

第29到32节,老先知就kā神ê人ê尸体带tńg来埋葬tī家己ê坟墓内,并且交带伊ê全家,以后mā kā伊埋葬kah chit位神ê人做伙。老先知mā告知伊ê全家,chit位神ê人所传达ê信息一定会发生tī北国以色列。

第33到34节,耶罗波安并无因为亲身体验到上帝ê惩罚,kah听tio̍h神ê人所警告ê话而悔改归向上帝,伊iáu-koh继续我行我素,家己设立祭司tī祭坛向偶像神明献祭。这mā说明北国以色列后来灭亡ê主要原因,就是拒绝顺从上帝。

重新查询 专卷研经 列王纪上系列
错误回报,请联系comm[@]fhl.net