Chit段经文记载两个所罗门ê仇敌ê记事，一是以东王哈达，二是叙利亚王利逊。Chiah-ê lóng tī说明上帝ê惩罚并无会随时出现，m̄-koh却会tī不知不觉ê中间，tī背逆者ê身上发生。

Chit段经文有关以东王哈达ê记事，mā thang参考撒母耳记下第八章13到14节，有记载大卫战胜了以东，并且hō͘以东臣服tī伊ê统治下。chit-má则讲以东王哈达成做所罗门头壳痛ê人物，因为伊想beh「复仇」，后来一直到犹大王约兰ê时代，mā就是大约主前849到842年间，以东得tio̍h独立ê机会（参考列王记下八：20）。讽刺ê是，伊kah所罗门mā有姻亲关系（参考三：1），chit-má却成做死对头。包括后来逃到埃及去避难ê耶罗波安，以及对所罗门有敌意ê领袖lóng tī埃及ê庇护之下，这mā就说明一件重要ê事实：单靠政治手段――即使是婚姻ê方式，beh走chhōe永久ê和平、繁荣是无可能ê，除非有上帝ê赐福kah保护。Chit-ê认bat即使tī今á日ê世界mā是仝款。

第14到18节，chit段经文补充了撒母耳记下第八章13到14节ê记事，说明大卫统治了以东了后，派军进驻以东。Chia soah讲是hō͘派去驻军tī以东ê是约押，伊tī以东驻军六个月，m̄-koh用真残酷ê手段残杀以东ê cha-po͘人。哈达是王室ê后裔，伊会得thang逃脱到埃及去避难，并且得tio̍h埃及王hō͘ in ê政治庇护，供给伊生活上所有ê需要。

第19到20节，chit两节讲埃及王m̄-nā hō͘ in以东ê哈达王储庇护，koh kā家己ê小姨嫁hō͘哈达，án-ne，哈达kah所罗门仝款lóng是埃及王ê kiáⁿ婿，身分lóng仝款。M̄-koh两人却是有非常大ê冤仇。

第21到22节，大卫往生，约押mā往生，这两消息对哈达来讲是非常重要ê。因为至少tī伊看起来，所罗门kah伊lóng是埃及王ê kiáⁿ婿，必定m̄敢随便对伊出兵。Koh讲，伊tī埃及chit段时间，mā培养了真chē实力。因为án-ne，伊向埃及请求tńg去以东，准备ài对抗以色列。

第23到25节，chit三节记载另外一位反抗所罗门ê仇敌，就是叙利亚ê以利亚大ê kiáⁿ利逊。伊ê事件背景thang参考撒母耳记下第八章3-8节，就thang知影叙利亚臣服tī大卫ê时代背景。

Tī所罗门iáu活teh ê时代，并无lóng真太平，至少哈达带领以东、利逊带领大马士革对以色列进行搅扰，hō͘所罗门真oh安宁，原因是伊背逆了上帝ê命令。