列王纪上 1章1节 到 1章10节   背景资料  下一笔
列王记上、下分卷点是用北国以色列亚哈王朝ê结束(上卷廿二:37),kah南国犹大王约沙法王死后无久(上卷廿二:50)作分界。

Tùi第一章1节开始直到第十一章43节止,chit段lóng是用所罗门王ê记事为主轴。接落去tùi第十二章开始,就是描述以色列王国分裂做做南kah北两国ê情形,而所有分裂ê经过kah了后ê情景,是tùi上卷第十二章起,一直到下卷第十七章41节止,交替绍介南、北两国ê状况,然后tùi下卷第十八章开始,记载南国犹大ê情景,直到第廿五章犹大王国被巴比伦帝国消灭,人民hông掠去做奴隶ê经过。

第一到二章,是记载大卫王kā王位传承hō͘伊kah拔示芭所生落来ê kiáⁿ所罗王ê经过。Mā是tùi大卫王开始,王位tùi原本上帝拣选,变成做世袭ê制度。单是chit点已经teh暗示大卫脱离上帝原本ài先知拣选君王带领以色列人民ê本意。

    Chit段经文描述大卫晚年ê时,伊ê众kiáⁿ开始有密谋篡位ê动作,特别是siōng有可能继承王位ê亚多尼雅因为忍不住气,就想beh拥兵宣告家己为王。这mā teh表示大卫晚年无法度巡视国政大事,众kiáⁿ争取王ê宫廷斗争浮出台面上。

    第1到4节,作者一开始就讲「chit时chūn,大卫已经老迈」,所谓「老迈」,应该是「七十岁」。因为伊是tī三十岁ê时被膏立为以色列ê王,然后伊统治四十年,其中包括tī希伯仑统治犹大七年半,tī耶路撒冷统治以色列kah犹大共计三十三年(参考撒母耳记下五:3—5)。可能是因为年迈体衰,因为án-ne,伊ê臣仆替伊chhōe一位名叫「雅比莎」ê处女服侍伊,伊并m̄是被选来做bó͘ ê,却是类似今á日ê看护工作仝款,这mā是第4节所讲ê,大卫无kah伊亲近ê意思。Chit点mā kah后来亚多尼雅请求所罗门kā chit位cha-bó͘-gín-á hō͘伊做bó͘有关(参考二:17)。这是古代社会一种特异ê看法,认为hō͘处女困tī cha-po͘人身上thang取暖,hō͘身躯健康。M̄-koh作者mā特别强调,大卫「无kah伊发生关系」。

	第5到8节,大卫ê大kiáⁿ暗嫩被押沙龙杀害,第二kiáⁿ基利押(只出现tī撒母耳记下第三章3节),而押沙龙因为叛变死去,chit-má大卫kiáⁿ中以亚多尼雅为伊ê kiáⁿ群中是siōng年长ê。伊第一个想beh ê就是得tio̍h王位继承权。事实上当时伊ê条件siōng好,m̄-koh伊无经过大卫同意,就争取到元帅约押、祭司亚比亚他ê支持,m̄-koh却无得tio̍h「祭司撒督、耶何耶大ê kiáⁿ比拿雅,以及「先知拿单、示每、利以,kah大卫ê众侍卫」ê支持,这表示伊虽然有得tio̍h约押ê军方势力支持,m̄-koh siōng重要ê,是大卫ê禁卫军,特别是先知拿单等人ê支持,这真危险。

Tùi chit段经文看tio̍h亚多尼雅bē记得约押拥有兵权而且恃兵而骄,真oh驾驭,大卫是一直teh想办法beh除掉伊(参考二:5-6)。因为án-ne,伊chhōe约押本身就是一步危险ê棋子。Á约押kah亚比亚他之所以支持伊,真可能是因认为亚多尼雅是大kiáⁿ,继承王位乃是理所当然ê事。Mā tùi chia看出当时王宫里有两派人马,一派拥护亚多尼雅,另外一派则拥护所罗门。拥护所罗门ê是用先知拿单为首,加上祭司撒督,以及大卫ê侍卫军团,这mā形成非常坚强ê一股拥护所罗门继承王位ê势力。Á先知拿单是主导hō͘所罗门继承王位ê主要人物。

    第9到10节,有一工,亚多尼雅举办献祭礼仪,而且排设筵席宴请大卫其他ê kiáⁿ,mā就是伊ê众小弟kah王室大臣,m̄-koh却独漏先知拿单、比拿雅、同父异母ê小弟所罗门,以及王室ê侍卫军。

重新查询 专卷研经 列王纪上系列
错误回报,请联系comm[@]fhl.net