使徒保罗tùi开始就建立一个siōng基本ê信仰认知：每一个信耶稣ê人，lóng是耶稣福音ê奴仆。有奴仆ê认知了后，就bē骄傲，认为家己真重要，真了不起而看bē起别人。只有kā家己建立tī福音事工上奴仆ê角色，chiah会知影tī福音事工上，无夸耀家己ê成就。

另外一个问题是，面对哥林多教会分党结派ê情形，并且是用伊kah其他如亚波罗、彼得等人ê名义所组成ê派系，伊mā一定tio̍h hō͘ in正确ê纠正，免得伊kah其他同工ê名koh一pái hō͘人误用，而损害了福音ê圣洁。

Tī chit段经文中，使徒保罗强调福音ê奴仆并无甚么好夸口ê，所以就无甚么资格去批评别人ê长短。因为奴仆ê工作，就是先kā家己ê本份ê tāi-chì做好。伊对hiah-ê用伊kah其他门徒名义结成党派ê人提出明确ê指责，讲in是骄傲ê一阵信徒，chit种信仰态度并bē-tàng取。

第1到2节，chit两节真清楚，使徒保罗提起任何参与福音事工ê人，lóng是福音ê奴仆。奴仆ê职责就是对主人忠心。Chia特别指出「上帝之奥秘」，意思是teh指福音ê信息，tī一般人看起来是愚戆ê，m̄-koh tī福音事工ê人看起来是性命拯救ê气力。

Koh讲，使徒保罗讲「应该kā阮当做是基督ê奴仆」，chit句话是使徒保罗tī宣教工作上为家己所做ê定位，mā是hō͘所有为福音事工献身ê每一个人非常重要ê认bat。Chit句话同时mā是teh kā哥林多教会ê信徒讲，m̄-thang kā使徒保罗、亚波罗、彼得等人看做是「领袖」，á是教会ê「头」，hit种看法是有错误 ê。既然是「奴仆」，就无所谓「领袖」thang讲。

第3到5节，使徒保罗提起：人ê审判事小，上帝ê审判chiah是siōng重要ê事。因为上帝是审判人心内动机ê上帝。只有他chiah明白所有ê一切，因为所有隐藏ê，lóng将tī上帝面前显露出来（参考希伯来书四：13）。所以使徒保罗tī chia koh一pái提醒信徒，m̄-thang随便评断人。因为人ê评断bē标准，mā无一定正确。

第6到7节，所谓「chiah-ê tāi-chì」是teh指分党结派ê事，使徒保罗特别用家己kah亚波罗做例，表示伊ē-tàng hō͘家己á是亚波罗hō͘人指责，m̄-koh无希望哥林多教会ê信徒彼此之间有分裂ê现象。因为一切lóng是tùi上帝来赏赐，无人ē-tàng自认比别人koh khah高贵、有地位。

第8到10节，chit段经文真清楚指出哥林多教会信徒ê骄傲，in认为家己比别人koh khah高贵，koh khah有才能。所以使徒保罗故意用非常明显ê对比，而且语带讽刺句来说明家己kah其他同工ê卑微，故意凸显哥林多教会信徒自认ê高贵，而使徒保罗故意kā家己kah其他同工自认ná亲像被罗马帝国俘虏beh送去竞技场被耻笑ê囚犯仝款。

第11到13节，这几节经文thang参考哥林多后书第四章7到12节、第六章4到10节、第十一章23到33节、第十二章10节等等。Tī chiah-ê经文中lóng ē-tàng看出使徒保罗所经历到ê困境。这真清楚说明一点：真正传福音ê人，是ài面对迫害者ê欺压、迫害，bē爽快到有时间去内争、相斗，chiah-ê lóng是闲来无所事事ê人chiah会有ê现象。M̄-koh身为基督信徒，lóng会因为领受耶稣ê救恩，无闲beh kā chit大好消息设法传扬出去。伊tī第12节chia讲家己是靠「「双手辛劳工作来饲家己」，chit点thang tùi使徒行传第十八章3节看出来，使徒保罗是óa靠织帐棚饲家己。