哥林多前书 14章26节 到 14章40节   背景资料  上一笔  下一笔
Chit段经文讲tio̍h tī教会内ê聚会中应该有ê态度。基本上,使徒保罗讲究ê是秩序ê重要性。Tī教会聚会中,有秩序是进入敬拜ê第一步,如果连秩序lóng无,he是无法度hō͘人专心、敬虔ê注意听上帝ê话ê信息。Á chit种秩序,一定tio̍h约束某一kóa特别ài展ê人,因为聚会是beh敬拜上帝, m̄是teh显示个人ê能力。Koh讲,chit段经文mā讨论到关系妇女teh聚会中应该注意ê事。

第26节,聚会中有人唱诗歌、有人教导、有人讲灵语mā有人翻译等等,chiah-ê若是对聚会有帮助,就会利益参加聚会ê人。

第27到30节,chit段经文中,使徒保罗真清楚讲出敬拜上帝,就应该以上帝为主,m̄是用某一个人为重。参加聚会ê众人ài beh特别注意传讲信息ê人所讲ê内容。

第31到33节,teh敬拜上帝ê场合,任何人lóng thang分享家己ê性命见证。无人ē-tàng阻止别人见证。因为上帝喜爱ê,就是和谐,而无爱教会信仰团契有纷争ê事出现。

第34到35节,真有可能是tī哥林多教会中间,有kóa妇女mā学tio̍h讲灵语,结果因为以「灵语」为优先,无人敢阻止讲灵语ê妇女,结果kui个聚会lóng僵tī hia无法度结束,á是本来有准备ài分享信息ê人,mā无法度进行,干涉搅扰礼拜ê秩序。另外一点,mā有可能是当时哥林多妇女ê社会地位真低,当时ê观念是:妇女tī公众场合讲话是「不体面ê事」,指ê就是当时社会ê普遍观念。所以tī教会聚会中如果有妇女公开宣讲á是表示意见,真容易造成一般人对基督教信仰ê误解。Tùi第十一章5节thang看出使徒保罗并无反对妇女公开宣讲福音,伊要求ê是beh讲福音ê妇女,也tio̍h按照当时ê风俗,将头巾罩tio̍h。不过mā因为使徒保罗Tī chit两节ê讲法,chiap-chiap受tio̍h现代妇女ê批判,认为使徒保罗iáu是无因为耶稣ê福音,跳脱传统风俗ê思维。

第36节,使徒保罗tī chia指责哥林多教会信徒有人kā该教会当做是标准、中心,有种目中无人ê傲慢态度。表示该教会信徒bē彼此尊重,mā bē尊重其他地区ê教会,这是真无好ê行为。

第37到40节,使徒保罗劝勉哥林多教会信徒,无论家己是偏向讲灵语,á是重视传讲上帝ê信息,lóng tio̍h彼此互相容忍kah接受,mā只有án-ne,chiah ē-tàng免除彼此之间相争,避免无应该有ê纷争。

重新查询 专卷研经 哥林多前书系列
错误回报,请联系comm[@]fhl.net