哥林多前书 13章1节 到 13章10节   背景资料  上一笔  下一笔
Chit章ē-sái讲是使徒保罗书信中siōng-kài顶港有名声下港有出名ê一首súi诗歌。Tī使徒保罗ê看法里,爱m̄是一种恩赐,却是圣神所结ê果子。Tī第一章22到23节,使徒保罗bat形容讲:「犹太人要求神迹,希腊人走chhōe智慧,阮却宣扬被钉十字架ê基督。」chit句话thang koh再加添一句讲:「罗马人喜好权力。」m̄-koh,无论是神迹、智慧、权力,如果无爱ê基础,chiah-ê lóng会对人ê性命造成伤害。Á十字架就是爱ê记号,因为耶稣被钉十字架,就是teh表明上帝对人类ê疼。

Tī chit段经文中,使徒保罗先举出四种kah恩赐有关ê例,包括讲各种方言ê能力,讲道ê chiah ē-tàng、知识,坚定ê信心,以及赈济sàn-chhiah人kah献身ê勇气等,chiah-ê lóng一定tio̍h用疼做基础chiah有意义。然后伊进一步解释爱ê意义。

第1到3节,因为有人强调家己真会讲各种方言,表示家己真有圣神ê恩赐,就án-ne使徒保罗开始讲述无论甚么人ē-tàng讲jōa-chē种无仝ê语言,甚至ē-tàng讲「天使」(其实chit-ê世间无人有chit种能力),无论有jōa-chē能力,就算ē-tàng「牺牲家己ê身躯hō͘人烧」,这看起来kah-ná真有信心ê款,如果m̄是因为疼ê缘故,就算有真chē才华á是能力,mā是枉然。

注意第3节所提起ê「牺牲家己ê身躯hō͘人烧」,tī早期教会有ê人为tio̍h信主耶稣被用非常残酷ê刑罚—火刑—对待。亲像但以理书第三章就teh记载巴比伦王尼布甲尼撒下令建造一座高27公尺、宽3公尺ê大神像,并命令全国人民tio̍h向hit-ê神像敬拜,如果m̄听话就beh被「扔进焰火熊熊ê窑里」(参考但以理书三:1—7),m̄-koh有三个但以理ê朋友—沙得拉、米沙、亚伯尼歌,拒绝接受chit种命令,就因此被tàn tī火窑里烧,m̄-koh上帝kah in同在,三个lóng无受tio̍h任何伤。使徒保罗khah强调ê是,即使有án-ne坚强ê信心,mā是beh tùi疼ê出发点开始,m̄是因为有án-ne坚定信心,而成做展宝ê一个诱因。

第4到7节,tī chit段经文中,使徒保罗解释甚么是爱。Tī第4节ê「坚忍」,是kah第5节ê「不轻易发怒」有关系,因为「坚忍」是teh指对人容忍ê意思。Mā就是teh指对hiah-ê得罪咱ê人,会保持赦免ê心。第6节「无欢喜不义」,意思就是不tùi作恶ê事中得tio̍h快乐。Ná亲像有ê人会传述别人ê 错误,当做「茶余饭后」消遣题。「只喜爱真理」,这并m̄是一件容易ê事,mā m̄是人人lóng做会到ê事,人siōng大ê通病是,真无欢喜听tio̍h真理ê声音,因为真理ê另外一面,就是会kā人ê恶hō͘显露出来。真理mā thang讲是上帝ê另外一个记号。第7节ê「爱ē-tàng包容一切」,chia所讲ê「包容」,是teh指将别人ê 错误「修补」过来,是暗中修补,设法将别人所犯ê 错误 hō͘ in修正过来,m̄是hō͘ hit人tī众人面前sià面子、难堪。

第8到10节,使徒保罗tī chia讲「爱是永恒ê」,相对ê,其它ê则暂时ê,会跟tòe时间过去。所谓「永恒」,kah「终止」、「过去」,以及第9节ê「有限」、第10节:「ē-sái讲是,hit-ê完全ê一到,有限ê就会消失à。」chia ê「完全」,是teh指成熟,mā就是最终极ê目标,mā thang指上帝ê拯救来临ê意思。

重新查询 专卷研经 哥林多前书系列
错误回报,请联系comm[@]fhl.net