这是第一pái使徒保罗提起有关圣餐ê事，tī第十一章20到32节伊koh khah清楚说明圣餐所表明ê意义。特别ê所在是伊将圣餐ê事kah拜偶像、食祭拜过偶像ê食物同齐讨论。原因是哥林多教会中间有信徒自认真有知识，信仰真坚定，所以就参与庙会中祭祀后ê筵席，lim食hiah-ê拜偶像过了后ê食物。使徒保罗讲tī hiah-ê偶像背后所表明ê信仰，够额引人入罪。所以伊特别用耶稣ê圣餐来譬喻说明。

第14到15节，使徒保罗劝勉哥林多教会信徒，一定会远离拜偶像ê事，而这siōng好ê方式，就是mài去参与in任何祭祀崇拜ê行为。

第16到17节，使徒保罗认为圣餐就是ná亲像分享了基督ê血、身躯，mā就是kah基督已经完全合一à。使徒保罗会án-ne解释，有一个siōng基本ê前提，就是教会乃是基督ê身躯（参考以弗所书一：23），基督徒tī教会chit-ê信仰团契中，就ná亲像tī基督ê身躯内面仝款，是kah伊合做一个，无法度分开ê，因为已经kah耶稣ê性命结合做伙，chit种结合ê意义所表明出来ê，就是性命ê共同体。Ná亲像伊写hō͘加拉太教会ê书信中所讲ê：「Án ne，chit-má teh 活ê 我m̄ 是原来ê 我，是基督tiàm-tī 我内面teh 活；我chit-má teh 活，是靠信上帝ê Kiáⁿ teh 活；基督疼我，为tio̍h 我放sak 性命。(全民版)」（加拉太书二：20）

第18到22节，使徒保罗强调一个基本观念：献祭hō͘上帝，所表示ê m̄-nā kan-taⁿ是祭物本身，却是tùi祭坛所显明出来ê意义。因为祭坛表明ê是：上帝显现、出现，á是khiā起ê位置。所以做一个人献祭hō͘上帝ê时，伊m̄是单单将物件pái tī祭坛上而已，却是teh表明伊kah上帝之间有bē-tàng分ê关系。仝款ê，当拜偶像ê人，将祭物献tī祭坛上ê时chūn，伊所表达ê意思就是敬拜，m̄是单单将祭物khǹg tī祭坛上而已。续落来，伊强调一个人若是去享用拜偶像ê食物，koh怎样ē-tàng来享用主耶稣救赎ê圣餐？he是无法度án-ne做ê。因为偶像就是鬼附身ê记号，圣餐是耶稣救赎ê恩典，二者绝对bē-tàng混淆。