历代志上 29章1节 到 29章9节   背景资料  上一笔  下一笔
Chit章主要是有两个段落,第一是tùi第1到9节,大卫王为tio̍h beh建造圣殿,除了tī第廿八章对全体以色列领袖表明chit项工程ê重要性,mā hō͘ in知影继承伊王位ê所罗门,tī建造工程上需要大家ê扶持、协助。chit-má伊是向全体以色列人民宣告chit项工程,而且强调这m̄是为人建造ê圣殿,却是为上帝。因为án-ne,除了伊奉献财物以外,伊mā希望全体以色列人民共同参与chit项工程建造ê需要。第二段落是tùi第10到25节,tī chit段落里,大卫王带领全体以色列人民向上帝献上感恩。以色列人民也kah跟tòe伊奉献财物做建造圣殿ê需要。最后一个段落是第26到30节,这五节mā是历代志上ê结语,说明大卫王统治结束,伊ê kiáⁿ所罗门继承伊ê王位。

Tī chit段经文内底,大卫对全体以色列人民宣告beh建造圣殿ê原因,并鼓励大家参与建造圣殿ê奉献行列,以表示大家lóng参与有份。Mā tùi chia thang看出建造圣殿ê花费确实是非常重,负担真大。

第1节,chit节大卫王真清楚表明,伊ê kiáⁿ所罗门iáu少年,经验不足,而beh建造圣殿ê chit项工程是非常艰巨,因为这是为上帝而建。这真清楚teh表明,若是单由所罗门来执行chit项工程ê建造,是无够ê,确实是需要大家ê协助。可见大卫王对所罗门ê疼护,kah伊此生siōng大ê心愿,就是希望伊ê kiáⁿ所罗门ē-tàng顺利完成伊建造圣殿ê心愿。

第2到5节,大卫王tī chia表示建造圣殿所需要ê建材,伊已经准备ê差不多了,m̄-koh伊知影除了伊所准备ê一切外,恐惊iáu不够额,而伊无法度亲目看见圣殿ê建造情形。因为án-ne,伊hō͘以色列人民知影伊准备ê,希望全体人民mā加入参与奉献ê行列,这mā讲出两件重要ê事:一是thang预防建造圣殿所需要ê开销不足。二是hō͘全体人民lóng有机会参与,这比伊个人奉献一切koh-khah有意义。伊先表明家己捐献出来ê,包括「一百gōa公吨siōng好ê金子,kah大约两百四十公吨纯银」,这确实是一个庞大ê数目,mā显示出大卫王ê财富非常雄厚。

第6到9节,当大卫王án-ne宣布,以色列各界代表因为大卫王早已经召集in宣告chit件事,因为án-ne,当chiah-ê代表tńg去转告hō͘所有人民ê时chūn,大家lóng会清楚知影这确实是出tī大卫王ê意思。因为án-ne,纷纷烧热烈参与奉献建造圣殿,结果民众koh奉献了「一百七十gōa公吨ê金子,三百四十gōa公吨ê银á,大约六百二十公吨ê铜,kah三千四百公吨ê铁」等,chiah-ê lóng teh表明以色列人民确实在大卫王治理之下,m̄-nā国家财富雄厚,人民mā非常富有。Á chiah-ê捐献出来ê金银铜铁,lóng khǹg tī「圣殿宝库」,这是临时ê,因为圣殿iáu未建造完成,而且由葛顺族ê利未人耶歇管理。M̄-koh khah重要ê,就是「人民乐意献hō͘上主;大家lóng欢喜有hiah-ni̍h chē物件奉献出来」,chit点chiah是siōng重要ê事,表示奉献m̄是出tī勉强,却是出tī感恩ê心。

重新查询 专卷研经 历代志上系列
错误回报,请联系comm[@]fhl.net