历代志上 28章1节 到 28章8节   背景资料  上一笔  下一笔
第廿八到廿九章,是记载大卫王kā伊ê王权移交hō͘伊ê kiáⁿ所罗门。Chit两章无亲像列王记上第一到二章记载有关大卫王晚年,王室发生内斗ê情形,包括亚多尼雅密谋夺取王位;大卫王交带所罗门整肃约押、示每等人。作者省略án-ne资料ê原因,真可能是beh kā chit pái ê政权转移,描写做是一pái和平、顺利,并且是全以色列所有ê族群lóng接受ê。Koh khah重要ê一点,tùi大卫王到所罗门,以后以色列君王(包括北国ê以色列、南国ê犹大),政权ê转移无koh是由先知á是大祭司直接tùi上帝受命膏立,却是成做世袭(除了夺权篡位者外)。可见历代志作者所持ê观点是属tī官方资料ê立场khah-chē。

Chit章经文thang分做两部分来看,一是大卫王对全国各支族代表、政府高级官员讲话,主要koh再说明建造圣殿ê事。等于是为所罗门以后beh建造圣殿ê事,做重要ê背书,ài全国代表一定tio̍h协助所罗门达成任务。二是对所罗门讲话,hō͘伊知影关系建造圣殿ê所有大细事。

Ná亲像每一个统治者所期待ê,就是beh稳定国家政权,除了有坚强ê国防、经济、政治之外,koh khah需要有宗教力量ê支撑,若无,民心真oh安定,这情况是古今中外lóng然。大卫王向以色列各支族ê族长、政府各级重要官员,包括军事将领等说明,伊无建造圣殿,而需要由伊ê kiáⁿ所罗门建造ê原因,mā希望藉tio̍h in ê帮助,tī伊往生后,in thang支持所罗门完成建造圣殿ê工作。这mā等于是大卫王teh交带遗言。

第1节,chit节thang看出大卫王召集全国siōng koân代表大会,出席者包括各支族代表,以及政府高级官员、军事将领,kah王室代表等,全部lóng召集到耶路撒冷。

  	第2到5节,chit段经文大卫王真清楚说明伊原本是想beh建造圣殿,好安置上帝ê约柜,好荣耀上帝。M̄-koh,上帝不准,主要原因是大卫王因为不时出兵相战,致使伊ê手「流过真chē人ê血」。然后伊讲上帝犹大支族中,伊被拣选出来做王,而且拣选伊ê kiáⁿ所罗门thang续接伊ê王权。这等于确认所罗门就是王位ê继承人。

第6到7节,tī chit chit两节经文中,大卫讲有两件事,是上帝对伊交带ê事:一是讲所罗门beh建造圣殿。二是上帝会kah所罗门同在,而且看待所罗门ná亲像kiáⁿ仝款ê疼伊。M̄-koh基本要件是所罗门一定tio̍h遵行上帝一切律法命令chiah thang。

第8节,伊命令顶面所讲以色列全国各界代表一定tio̍h完成上帝交带ê这两件事,除了协助所罗门完成建造圣殿ê工作,mā tio̍h遵行上帝ê命令旨意。

重新查询 专卷研经 历代志上系列
错误回报,请联系comm[@]fhl.net