Tùi第十八章到第二十章，lóng是记载大卫tī战事上ê功绩。主要是teh说明上帝kah伊同在，hō͘大卫有够额ê气力扩展疆域，mā hō͘敌人臣服tī伊ê统治下。其中包括摩押人、以东人以及叙利亚人。

Chit段经文是描述大卫koh一pái phah败非利士人，mā降服了叙利亚。

第1到2节，大卫攻打迦特城，chit-ê城mā是过去tī大卫逃避扫罗追缉ê时bat收留过伊ê城（参考撒母耳记上第廿七章）。大卫为甚么beh攻打hit-ê城？chia并无交带。同时，大卫mā phah败摩押人，hō͘ in lóng来进贡。

第3到4节，大卫koh去攻打叙利亚，原因是叙利亚王哈大底谢想beh扩张领土，被大卫phah败，结果hō͘大卫掳获了真chē战利品，包括战车一千辆、骑兵七千人、步兵两万人。M̄-koh大卫只有留落来够额拉一百辆战车ê马匹。

第5到8节，tī chit段经文中，描写大卫m̄-nā是phah败叙利亚，而且iáu派兵驻在叙利亚，管理叙利亚。伊mā搜刮了叙利亚军官所the̍h ê「金盾牌」，并且tùi叙利亚王哈大底谢处搜取到koh-khah chē ê铜，后来chiah-ê铜lóng用tī铸造圣殿ê器皿。