历代志上 11章1节 到 11章9节   背景资料  上一笔  下一笔
Tùi第十一章开始,直到第廿九章止,lóng是记载有关大卫王朝ê种种事迹,可见无论是撒母耳记á是历代志ê作者,lóng对大卫王非常ê重视。

头前有提起过,历代志就是用大卫kah所罗门两位君王为主轴结构起来ê。上卷以大卫王朝为主轴,下卷以所罗门建造圣殿主轴。然后chiah讲述南国犹大历代君王统治ê情况。

Chit段经文thang参考撒母耳下第五章1到10节。Tī chia历代志上作者只简单记载大卫被拥护为以色列王ê经过。重点khǹg tī大卫是全以色列人民共同拥护出来带领in ê王,因为「上主――万军ê统帅kah伊同在」,chit句话ē-sái讲是大卫一生ê写照。作者用chit种句话有一个明显ê目的,就是君王制度固然是好,m̄-koh beh平衡君王ê权利,只有tńg来到信仰ê层面,chiah ē-tàng hō͘人学习谦卑、认罪,mā只有án-ne,chiah bē发生集大权tī一身ê君王乱使用权柄,却是会学习知影家己ê软弱kah有限,mā会有犯错ê可能。大卫一生ê经历就是án-ne teh说明chit种信仰认知。

第1到3节,chia所讲ê「以色列所有ê人」,kah「所有以色列ê长老」,chit种词句就是teh指北方ê以色列支族。希伯仑是tī耶路撒冷南边。In来请求大卫做in ê王,并且tī上帝面前kah大卫立约,表示愿意顺服ê意思。因为án-ne,in就「膏立」大卫作以色列ê王。

第4到6节,chit段经文是记载大卫率领以色列军队去进攻耶布斯人ê城,mā thang看出chit-ê城tī约书亚带领以色列人民进入迦南了后,直到扫罗当政ê时期lóng iáu未被攻打落来。Mā因为chit-ê城tú好隔阂tio̍h南部ê犹大、便雅悯kah西缅支族,久了后,就kah北部支族ê同胞疏远à。大卫决定攻取耶布斯人ê chit-ê城,是真有智慧ê。后来chiâⁿ实phah落来,就改hit-ê城ê名为「耶路撒冷」。因为耶路撒冷是tī山phiāⁿ上,因为án-ne易守难攻。为tio̍h鼓舞以色列军队攻入城去,大卫用siōng大ê奖赏,就是甚么人tāi先phah入去,甚么人就当统帅(ná亲像今á日ê国防部长)。

第7到9节,果然,重赏之下出勇夫,约押,原本就是大卫身边ê大将,伊第一个率兵攻入耶路撒冷城。因为án-ne,伊当了元帅。大卫kā hit-ê城整建ê koh khah坚固,而且kā王宫迁入hit-ê城内,因为án-ne,hit-ê城koh kā它称做「大卫城」。

Kui个大卫ê事迹,thang用chit句话来形容:上主—―万军ê统帅kah伊同在。

重新查询 专卷研经 历代志上系列
错误回报,请联系comm[@]fhl.net